(ඩයනා උදයංගනී)

අගමැතිවරයාට පාර්ලිමේන්තුවේ දී ප්‍රකාශයක් කිරීමට කිසිඳු බාධාවක් නොමැති බවත්, එහි අන්තර්ගතය කුමක්ද යන්න දැන්ම කිව නොහැකි බවත් සම කැබිනට් ප්‍රකාශක, ජනමාධ්‍ය අමාත්‍ය, ආචාර්ය නාලක ගොඩහේවා මහතා පැවසීය.

ඒ ගැන කිසිවක් ඇමති මණ්ඩලයට දැනුම් දී නැතැයි ද ඇමතිවරයා සඳහන් කළේය.

රටේ දේශපාලන තත්වය සම්බන්ධයෙන් විවිධ දේශපාලනඥයන් විවිධ ප්‍රකාශ කරන්නේ යටි අරමුණු ඇතිව බව කී ඇමතිවරයා රජයේ ස්ථාවරයක් මෙතෙක් ප්‍රකාශ වී නැතැයි ද පැවසීය.

ඉදිරියේදී සිදුවන්නේ කුමක්ද යන්න නිශ්චිතව ප්‍රකාශ කළ නොහැකි බව කී ගොඩහේවා මහතා තව සාකච්ඡා කිහිපයක් ඉදිරියේදී පැවැත්වීමට නියමිත බවත්, හරියටම සිදුවන දේ කුමක්ද යන්න ඉන්පසු දැනගත හැකි බවත් කීය.

රටේ පවතින අර්බුදකාරී තත්වය හමුවේ විපක්‍ෂයත් එක්වී රජයක් පිහිටුවීමට සූදානම් නම් අගමැතිවරයාත් ඉල්ලා අස්වී නව කැබිනට් මණ්ඩලයක් පිහිටුවන්නට සූදානම් බව ප්‍රකාශ වී තිබුණත්, ඒ සඳහා තාමත් විපක්‍ෂයෙන් සාධනීය ප්‍රතිචාරයක් ලැබී නැතැයි ද ඇමතිවරයා කීවේය.

අමාත්‍ය නාලක ගොඩහේවා මහතා මේ බව පැවසුවේ රජයේ ප්‍රවෘත්ති දෙපාර්තමේන්තුවේදී අද (3) පැවති කැබිනට් තීරණ දැනුම්දීමේ මාධ්‍ය හමුවේදී මාධ්‍යවේදියකු නැගූ පැනයකට පිළිතුරු දෙමිනි.

රටේ ආර්ථික ගැටලුවට විසඳුම් සෙවීමේදී රටේ දේශපාලන ස්ථාවරත්වය ඉතා වැදගත් බව කී ගොඩහේවා මහතා එහිදී රජයෙන් වෙන්ව ස්වාධීන වී සිටින පාර්ශව මෙන්ම විපක්‍ෂය එක්කරගෙන රජය ශක්තිමත් කර ගැනීම වැදගත් බව ජනාධිපතිවරයා ද විවිධ සාකච්ඡාවලදී සඳහන් කර තිබූ බව පැවසීය.

රජයෙන් වෙන්වූ කණ්ඩායම් සමඟ සාධනීය සාකච්ඡා පැවැත්වී ඇතැයි කී ඇමතිවරයා කැබිනට් මණ්ඩලය වෙනස් කරනවාද එක්වන අය කවුද යන්න මේ සතිය තුළ තීරණය වනු ඇතැයි සඳහන් කළේය.

වෙන්නේ කුමක් ද යන්න බලා සිටිය යුතු බව කී ගොඩහේවා මහතා  රටේ ජනතාව පීඩාවට පත්ව සිටින අවස්ථාවක පලායාම සුදුසු නැති බවත්, දේශපාලනය පසෙක දමා සියලුදෙනා රට වෙනුවෙන් එක්විය යුතු බවත් කීවේය.

රටේ පවතින දේශපාලන තත්වය සැලකිල්ලට ගෙන ජනාධිපතිවරයා නව කුඩා නව කැබිනට් මණ්ඩලයක් පත්කර රජය පවත්වාගෙන යන බවද ඇමතිවරයා පැවසීය.

ජාතික එකඟතා ආණ්ඩුවක් පත්වනවා නම් එහිත් අග්‍රාමාත්‍යධූරය දරන්නේ මහින්ද රාජපක්‍ෂ මහතාම බවට බැසිල් රාජපක්‍ෂ මහතා කර ඇති ප්‍රකාශයක් සම්බන්ධයෙන් මාධ්‍යවේදියකු නැගූ පැනයකට පිළිතුරු දුන් ඇමතිවරයා පැවසුවේ බැසිල් රාජපක්‍ෂ මහතා අදහස් කර ඇත්තේ පිහිටුවන එකඟතා ආණ්ඩුවේ අගමැතිවරයා ලෙස පොදුජන පෙරමුණ යෝජනා කරන්නේ මහින්ද රාජපක්‍ෂ මහතාය යන්න බවයි. අගමැතිවරයා ඔහු හෝ වෙනත් අයකු විය හැකි බව ද ගොඩහේවා මහතා කීවේය.