(අංජුල මහික වීරරත්න)

අක්කර භාගයකින් රුපියල් ලක්ෂ 60 ක ආදායමක් ලබා ලබාගත හැකි මෙරට වගාවට සුදුසු නව දෙළුම් ප්‍රභේද දෙකක් හඳුන්වා දීම සඳහා කෘෂිකර්ම දෙපාර්තමේන්තුවේ කෘෂි විද්‍යාඥයින්  කළ පර්යේෂණ සාර්ථක වී තිබේ.

මේ වනවිට එම දෙළුම් ප්‍රභේද දෙක නොරොච්චෝලේ ප්‍රදේශයේ සාර්ථකව වගා කර ඇති අතර එක් ගසකින් වරකට කිලෝග්‍රෑම් 10ක  අස්වැන්නක් ලබා ගැනීමට හැකි අතර අවුරුද්ද පුරාම ඵල හට ගැනීම සුවිශේෂී බව කෘෂිකර්ම දෙපාර්තමේන්තුව කියයි.මෙම එක් දෙලු ම් ගසක ආයු කාලය වසර 30කි.

දැනට මෙම නව දෙළුම් ප්‍රභේද දෙක වගා කිරීම සදහා උචිත ප්‍රදේශ හදුනාගැනීම සඳහා ක්ෂේත්‍ර පර්යේෂණ සිදු කෙරෙන අතර මෙම නව ප්‍රභේද දෙක සදහා මෙතෙක් නාමකරණය කර නැති අතර බෝග නිදහස් කිරීමේ කමිටුවේ නිර්දේශ ලද වහාම එම නව දෙළුම් ප්‍රභේද දෙක සඳහා නම් තැබීමට නියමිත බව කෘෂිකර්ම අධ්‍යක්ෂ ජනරාල් මාලතී පරසුරාමන් මහත්මිය කෘෂිකර්ම අමාත්‍ය මහින්ද අමරවීර මහතාට දැනුම් දුන්නාය.

කෘෂිකර්ම අමාත්‍යවරයා නොරොච්චෝලේ වගා කර ඇති එම දෙළුම් වගාව නිරීක්ෂණය කළේය.

එහිදී අදහස් දැක්වූ කෘෂිකර්ම අමාත්‍යවරයා සඳහන් කළේ වසරකට  දෙළුම් ආනයනය සඳහා රුපියල් මිලියන 900ක් පමණ වැය වන අතර නව දෙළුම් ප්‍රභේද වල වගා ඇරැඹූ පසු මෙරටට  දෙළුම් ආනයනය කිරීමට අවශ්‍ය නොවන බවයි.