ශ්‍රී ලංකන් ලොක්කෝ කෝප් කමිටුව හමුවට

( +++ සුජිත් හේවාජුලිගේ)

ආන්දෝලනාත්මක එයාර්බස් ගනුදෙනුව සම්බන්ධයෙන් කරුණු විමසීම සඳහා ශ්‍රී ලංකන් සමාගමේ ප්‍රධානින් ලබන 19 වැනිදා පොදු ව්‍යාපාර පිළිබඳ පාර්ලිමේන්තු කාරක සභාව හමුවට කැඳවා ඇත.

ශ්‍රී ලංකන් ගුවන් සමාගමේ ගනුදෙනු සම්බන්ධයෙන් නැවත විමර්ශනයක් පැවැත්වීමට අදහස් කර ඇති හෙයින් එහි මූලික පියවර ලෙස එහි ප්‍රධානීන් කැඳවා ඒ ගැන විමසීමට තීරණය කළ බව කෝප් කමිටුවේ සභාපති ජවිපෙ පාර්ලිමේන්තු මන්ත්‍රී සුනිල් හඳුන්නෙත්ති මහතා ලංකාදීපයට ඊයේ පැවැසීය.

මේ සාකච්ඡාවේදී ගුවන් සමාගමේ තවත් ගනුදෙනු කිහිපයක් ගැනද කරුණු සාකච්ඡා කිරීමට නියමිතය.

ශ්‍රී ලංකන් ගුවන් සමාගමේ ගනුදෙනු පිළිබඳව කෝප් කමිටුව මීට පෙරද විමර්ශනයක් පැවැත්වීය. එයාර් බස් ගනුදෙනුවක් ගැන රටේ ප්‍රබල ආන්දෝලනයක් ඇතිවී තිබෙන හෙයින් ඒ පිළිබඳව කරුණු සොයා බැලීම වැදගත් බවද හඳුන්නෙත්ති මහතා කීවේය.

මේ අතර මෙම ආන්දෝලනාත්මක එයාර් බස් ගනුදෙනුව සම්බන්ධයෙන් දිනක විවාදයක් මැතිසබයේදී ලබන 20 වැනිදා පැවැත්වීමට නියමිතය.

මේ අතර ශ්‍රී ලංකා ක්‍රිකට් ආයතනය ද ලබන 18 වැනිදා කෝප් කමිටුව හමුවට නැවතත් කැඳවා ඇත.

මහ බැංකු බැඳුම්කර සිද්ධියට අදාළ වෝහාරික විගණන වාර්තාව (Forensic Audit Report) සම්බන්ධයෙන්ද කරුණු සලකා බැලීමට කෝප් කමිටුව තීරණය කර ඇතත් රජයේ මුදල් කාරක සභාව ඒ කාරණය ලබන 18 වැනිදා සලකා බලන හෙයින් ඒ කටයුතු පසුවට කල් දැමූ බව සුනිල් හඳුන්නෙත්ති මහතා කීය.

වෝහාරික විගණන වාර්තාව පිළිබඳවද දෙදිනක විවාදයක් මැතිසබයේදී ලබන 18 හා 19 දිනවලදී පැවැත්වීමට නියමිතය.