(හිරාන් ප්‍රියංකර ජයසිංහ)

පොලිස් මත් ද්‍රව්‍ය කාර්යාංශය මගින් අත්අඩංගුවට ගනු ලැබූ කොකේන් මත්ද්‍රව්‍ය කිලෝ 769 යි ග්‍රෑම් 469 ක ප්‍රමාණය විනාශ කිරීම කොළඹ ප්‍රධාන මහෙස්ත්‍රාත් ලංකා ජයරත්න මෙනවිය හා ගල්කිස්ස ප්‍රධාන මහෙස්ත්‍රාත් එම්. එම්. එම්. නිෆාර් මහතාගේ අධීක්ෂණය යටතේ අද (01) සිදුකෙරිණි.

දියර ලෙස සකස් කර කොළඹ සිට දැඩි පොලිස් ආරක්ෂාව යටතේ රැගෙන ආ කොකේන් තොගය පුත්තලම ඉන්සි ඉකෝසයිකල් සමාගමේ සෙල්සියස් අංශක 1800 -2000 ක උෂ්ණත්වයකින් යුතු උදුනක් තුළ විනාශ කිරීම සිදුකෙරිණි.

ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් අද පැවැති උත්සවයකදී අදාළ කොකේන් තොගය විනාශ කිරීම ආරම්භ කෙරිණි.

පොලිස් විශේෂ කාර්ය බළකාය හා පොලිස් නිලධාරින්ගේ දැඩි ආරක්ෂාව යටතේ අදාළ කොකේන් තොගය විනාශ කිරීම සිදුවිය.

මේ අවස්ථාවට අන්තරායක ඖෂධ පාලක ජාතික මණ්ඩලය, පොලිස් මත්ද්‍රව්‍ය කාර්යාංශය, රස පරීක්ෂක දෙපාර්තමේන්තුව, මත්ද්‍රව්‍ය නිවාරණ ජනාධිපති කාර්ය සාධක බළකාය හා මහජන සෞඛ්‍ය පරීක්ෂක නිලධාරීහු ඇතුළු පිරිසක් සහභාගී වූහ.