(මනෝප‍්‍රිය ගුණසේකර)

රජයේ වාහනයක් අවභාවිතා කිරීමේ චෝදනාවට වරදකරු වූ දෙමළ ජාතික සන්ධානයේ දිගාමඩුල්ල දිස්ත‍්‍රික් හිටපු පාර්ලිමෙන්තු මන්ත‍්‍රී පී.එච්. පියසේන මහතාට වසර 04ක බරපතල වැඩ සහිත සිරදඬුවමක් නියම කළ කොළඹ මහාධිකරණ විනිසුරු ගිහාන් කුලතුංග මහතා රුපියල් ලක්‍ෂ 54ක දඩයකටද නියම කළේය.

පී.එච්. පියසේන මහතා පාර්ලිමෙන්තු මන්ත‍්‍රී ධූරයේ සිටියදී භාවිති කළ අග‍්‍රාමාත්‍ය කාර්යාලයට හා ජාතික ප‍්‍රතිපත්ති හා ආර්ථික කටයුතු අමාත්‍යංශයට අයත් ප‍්‍රාඩෝ වර්ගයේ ජීප් රථය ඔහු පාර්ලිමෙන්තු මන්ත‍්‍රී ධූරයෙන් ඉවත්වීමෙන් අනතුරුව ආපසු රජයට බාරනොදී අවභාවිතා කළ බවට පැමිණිල්ල විසින් සාධාරණ සැකයකින් තොරව ඔප්පු කොට ඇතැයි තීරණය කළ විනිසුරුවරයා ඔහුට මෙලෙස සිරදඬුවම් හා දඩ නියම කළේය.

චෝදනාවට වරදකරුවීම නිසා මෙලෙස දඩ හා සිරදඬුවම් නියම වුයේ දිගාමඩුල්ල හිටපු පාර්ලිමෙන්තු මන්ත‍්‍රී පී.එච්. පියසේන මහතාටය.

තනතුරු වලින් ඉවත්ව යන විට රජයේ වාහන ඇතුළු දේපළ යළි රජයට බාර නුදුන් මෙවැනි විත්තිකරුවකුට ලිහිල් දඬුවමක් ලබාදුන්නොත් ‘වැරදි කර ගැලවී යා හැකියි’ යනුවෙන් සමාජයට වැරදි පුර්වාදර්ශයක් ලැබිය හැකි බව පෙන්වා දෙමින් ජේෂ්ඨ රජයේ නීතීඥ නිරාශා ජයරත්න මහත්මිය කළ ඉල්ලීමක් පිළිගනිමින් විත්තිකරුට ආදාළ දඩුවම් නියම කෙරිණි.