පාස්කු ඉරිදා ත්‍රස්ත ප්‍රහාරවල මහ මොළකරු ලෙස සැලකෙන සහ්රාන් හෂීම් ඉන්දියාවේ නගරවලට ගොස් ඇත්තේ තමිල්නාඩුව හරහා යැයි මෙරට බලධාරීන් උපුටා දක්වමින් ‘ද හින්දු’ පුවත් වෙබ් අඩවිය අද (6) වාර්තා කළේය. 
 
කෙසේ නමුත් සහ්රාන් හෂීම් ගුවන් මගින් ඉන්දියාවට ගිය වාර්තා හෝ ආගමන විගමන වාර්තා හෝ පිළිබඳව සොයාගැනීමට නැතැයි ද ‘ද හින්දු’ පුවත් වෙබ් අඩවිය වාර්තා කර ඇත. 
 
“සහ්රාන් හෂීම් මුහුදු මාර්ගයෙන් මන්නාරමෙන් තමිල්නාඩුව යන්න ඇත. ඒ සඳහා හොඳටම අවස්ථාව තිබෙනවා” යැයි යුද හමුදාපති ලුතිනන් ජෙනරාල් මහේෂ් සේනානායක මහතා පැවැසීය යැයි ද ‘ද හින්දු’ වාර්තාවේ දැක්වේ. 
 
ඉන්දියාව ඇතුළු කලාපයේ බුද්ධි ආයතන සමඟ සම්බන්ධ වෙමින් සහයෝගීත්වයෙන් ත්‍රස්ත ජාලය පිළිබඳව තොරතුරු සොයමින් විමර්ශන කරන බව ද යුද හමුදාපතිවරයා පවසා ඇත. 
 
දැනට ලැබී තිබෙන තොරතුරුවලට අනුව සහ්රාන් හෂීම් 2018 වසරේ අවසාන භාගයේදී  බැංගෝලරය, කාශ්මීරය සහ කේරළයේ යම් යම් ස්ථානවලට ගමන් කර ඇතැයි ආරක්ෂක අංශ බලධාරීන් උපුටා දක්වමින් ‘ද හින්දු’ වෙබ් අඩවිය වාර්තා කර තිබිණි. 
 
“අනෙකුත් අන්තවාදීන් සහ ජිහාද්වාදීන් සමඟ සබඳතා තහවුරු කරගැනීම සහ්රාන් හෂීම් එම ස්ථානවලට යන්නට ඇතැයි අපි විශ්වාස කරනවා. ඒ සඳහා තොරතුරු ලැබී තිබෙනවා. ඔවුන් කලාපයේ සිට ඉන් පිටත සිටින පාර්ශව සමඟ සබඳතා ගොඩ නගාගෙන තිබෙනවා. ඔවුන් එහි කළේ මොනවාදැයි අපිට හරියටම කියන්න බැහැ. එහෙත් ඔවුන් වන්දනාවේ නොගිය බව නම් විශ්වාස” යැයි යුද හමුදාපති ලුතිනන් ජෙනරාල් මහේෂ් සේනානායක මහතා ‘ද හින්දු’ පුවත්පතට පවසා ඇතැයි ද එම වෙබ් අඩවියේ සඳහන් වේ. 
 
055