(යොහාන් භාසුර)

රුපියල් කෝටියකට අධික වටිනාකමින් යුත් ‘කොකේන්’ මත්ද්‍රව්‍ය ගුලි ලෙස ගිල ශ්‍රී ලංකාවට ගෙන ඒමට උත්සහ කළ උගන්ඩා ජාතිකයකු කටුනායක ගුවන්තොටුපළේදී ශ්‍රී ලංකා රේගුවේ මත්ද්‍රව්‍ය පාලන අංශයේ නිලධාරීන් අද (28) පස්වරුවේ අත්අඩංගුවට ගත් බව රේගු මාධ්‍ය ප්‍රකාශක, නියෝජ්‍ය රේගු අධ්‍යක්‍ෂ සුදන්ත සිල්වා මහතා පැවසීය.

උගන්ඩාවේ සිට කටාර් රාජ්‍යයේ දෝහා නගරය හරහා මෙරටට පැමිණි වයස අවුරුදු 43 ක මෙම පුද්ගලයා ගුවන් තොටුපලේ පිටවීමේ පර්යන්ථයේදී නවතා ප්‍රශ්න කිරීමේදී ඇතිවූ සැකය මත පරිලෝකනය කරන්න යන්ත්‍රය මගින් කළ පරීක්ෂාවේදී උදරයේ තිබූ සැක කටයුතු ගුලි රේගු නිලධාරීන් නිරීක්‍ෂණය කළ බවත් වැඩිදුර ප්‍රශ්න කිරීමේදී සැකකරු තම උදරයේ කොකේන් අඩංගු ගුලි තොගයක් ඇත්තේ යැයි හෙළි කළ බවත් රේගු මාධ්‍ය ප්‍රකාශකවරයා කීය.

ඉන් පසුව සැකකරුගේ ශරීරයෙන් ගුලි 17 ක් ඉවතට ගත් බව කී මාධ්‍ය ප්‍රකාශකවරයා එහි වෙළඳපළ වටිනාකම රුපියල් මිලියන 12 ක් පමණ වන්නේ යැයි ඇස්තමේන්තු කර ඇති බව ද සඳහන් කළේය.

සිද්ධිය සම්බන්ධයෙන් මූලික විමර්ශන සිදු කිරීමෙන් අනතුරුව ඉතිරි මත්ද්‍රව්‍ය අඩංගු ගුලි ඉවතට ගෙන වැඩිදුර විමර්ශන කටයුතු සිදු කිරීම සඳහා සැකකරු සහ මත්ද්‍රව්‍ය තොගය පොලිස් මත්ද්‍රව්‍ය කාර්යාංශය භාරදුන් බවත් සුදත්ත සිල්වා මහතා වැඩි දුරටත් කීය.