(උපලි ආනන්ද)

පොලිස් නිලධාරියකුගේ හක්ක පුපුරා දෙකඩ වී යටි ඇන්දේ දත් සියල්ල කැඩී යන අන්දමට පහරදුන් සැකකරුවන්ට ඇප ගැනීමට හැකිවන අන්දමට පදවිය පොලිසිය අධිකරණයට කරුණු  වසන් කරන ලදැයි පදවිය පොලිසියේ ක්‍රියාකලාපය පදවිය මහේස්ත්‍රාත් කසුන් කාංචන දසනායක මහතා හමුවේ දැඩි දෝෂ දර්ශනයට ලක් කළ නීතිඥ අජිත් දිසානායක මහතා අසාධාරණයට ලක් වූ පොලිස් නිලධාරියකුට සලකන්නේ මෙලෙස නම් සාමාන්‍ය මිනිසුන්ට කෙසේ සලකනවා ඇද්දැයි ප්‍රශ්න කළේය.

 තම සහෝදරිය සහ දරුවන් සමඟ සංගීත සංදර්ශනයක් නරඹමින් සිටි පොලිස් කොස්තාපල්වරයකුට යුද හමුදාවෙන් පලාගිය සෙබළකු ඇතුළු බීමත් පුද්ගලයන් තිදෙනකු  විසින් අතින් පයින් සහ හෙල්මටයකින් දරුණු ලෙස පහරදී ගෙල බැඳි රන් මාලය කඩාගැනීමේ සිද්ධිය සම්බන්ධයෙන් පොලිස් කොස්තාපල්වරයාගේ මවගේ පැමිණිල්ල බාර ගැනීම දින 04ක්ම පදවිය පොලිසිය ප්‍රතික්ෂේප කර ඇතැයි පෙන්වා දුන් නීතිඥ අජිත් දිසානායක මහතා සැකකරුවන්ට ඇප ගැනීමට හැකිවන අන්දමට පදවිය පොලිසියේ නිලධාරීන් උසාවියටත් කරුණු වසන් කර ඇතැයි පෙන්වා දුන්නේය”

පදවිය බෝගස්හන්දිය සැනසිලිගම ප්‍රදේශයේ පැවැති සංගීත සංදර්ශනයක් සිය  සහෝදරිය සහ දරුවන් සමඟ නරඹමින් සිටි කිලිනොච්චිය පොලිසියට අනුයුක්තව සේවය කරන කොස්තාපල් (94950) ආර්.ජී.ඩී. රත්නායක මහතාට යුද හමුදාවෙන් පලාගිය සෙබළකු ඇතුළු තිදෙනකු විසින් අතින් පයින් සහ ආරක්ෂිත හිස් වැසුම් වලින් පහර දී මුඛයේ යටි දත් ඇන්ද සහ දත් කඩා දැමීම පිළිබඳ පැමිණිල්ල කැඳවු අවස්ථාවේ දී අගතියට පත් පොලිස් කොස්තාපල්වරයාගේ අයිතිවාසිකම් වෙනුවෙන් පෙනී සිටි නීතිඥ අජිත් දිසානායක මහතා එසේ පැවසීය.