(ඩයනා උදයංගනී)

මේ මොහොතේ සියල්ලට ම වඩා වැදගත් වන්නේ රටේ දරුවන්ට අධ්‍යාපනය ලබාදීම බැවින් රට සහ රටේ අනාගතය වෙනුවෙන් සියල්ල අමතකර කර නොමිලේ හරි උගන්වනවා කියා දරුවන්ට අධ්‍යාපනය ලබාදෙන්නැයි තමන් ගුරුවරුන්ගෙන් කාරුණිකව ඉල්ලා සිටින බව ආචාර්ය ඉත්තෑපානේ ධම්මාලංකාර කොට්ටේ ශ්‍රී කල්‍යාණී සාමග්‍රී ධර්ම මහා සංඝ සභාවේ මහා නා හිමියෝ  පැවසූහ.

නිදහස් අධ්‍යාපනයේ පියාණන් වන සී.ඩබ්ලිව්.ඩබ්ලිව් කන්නන්ගර මහතාගේ අරමුණ වූයේ ඇති නැති හෝ වෙනත් භේද නොසලකා සියලුම දරුවන්ට නිදහස් අධ්‍යාපනය ලබාදීම වන බැවින් මේ මොහොතේ අනිත් සියලු දේ අමතක කර, බඩගින්නේ හෝ දරුවන්ට අධ්‍යාපනය ලබාදීමට කටයුතු කරන්නැයි තමන් ඉල්ලා සිටින බව ද මහ නා හිමියෝ සඳහන් කළහ.

ඉත්තෑපාන ධම්මාලංකාර මහ නාහිමියන් මේ බව පැවසුවේ සී.ඩබ්.ඩබ්. කන්නන්ගර මහතාගේ 137 වැනි ජන්ම දින සැමරුම යෙදුණු අද (13) ඒ මහතාගේ උපන් ගම වූ මතුගම, ලූල්බද්දුව ප්‍රදේශයේ පිහිටි කන්නන්ගර සමාධියට පුෂ්පෝපහාර දැක්වීමේ අවස්ථාවට එක්වෙමිනි.

එමෙන්ම සී.ඩබ්ලිව්.ඩබ්ලිව් කන්නන්ගර මහතා වෙනුවෙන් කෞතුගාගාරයක් පිහිටුවීම පිළිබඳ කතිකාවක් ද මහ නා හිමියන්ගේ සහ අධ්‍යාපන අමාත්‍ය දිනෙෂ් ගුණවර්ධන මහතාගේ ප්‍රධානත්වයෙන් මෙහිදී පැවැත්විණි.
එහිදී අදහස් දැක්වූ ඉත්තෑපාන ධම්මාලංකාර මහ නාහිමියෝ මෙසේ ද පැවසූහ.

“මම ඉතාම කරුණාවෙන් සඳහන් කරන්නේ රටේ ගුරුවරු පාසල් දරුවන්ට ඉගැන්වීම ඉක්මනින් ආරම්භ කළ යුතු බවයි. කන්නන්ගර ශ්‍රීමතාණන් අපට පෙන්වා දුන් දෙය වන්නේ ඇති නැති හෝ වෙනත් භේද නොසලකා සියලුම දරුවන්ට නිදහස් අධ්‍යාපනය ලබා දීමයි. එබැවින් මේ මොහොතේ මේ රටේ ගුරුවරුන්ට මා ඉතා කරුණාවෙන් කියන්නේ අනිත් සියලු දේ අමතක කරලා, බඩගින්නේ හරි දරුවන්ට අධ්‍යාපනය ලබාදීමට කටයුතු කරන්න. මේ මොහොතේ සියල්ලට ම වඩා වැදගත් දේ ඒකයි.

නොමිලේ හරි උගන්වනවා කියලා රට වෙනුවෙන් සහ රටේ අනාගතය වෙනුවෙන් දරුවන්ට උගන්වන්න. මේ කාර්යය ඉතා ඉක්මණින් සම්පූර්ණ කරගන්න අප කාටත් අවස්ථාව ලැබෙනවා ඇති. මෙවර මේ කටයුත්තට මුල් වෙලා තියෙන්නේ දිනේෂ් ගුණවර්ධන ඇමතිතුමා. බොරළුගොඩ සිංහයාගේ දරුවෝ වැඩක් අතගැහුවොත් ඒ වැඩේ ස්ථිර වශයෙන්ම කරනවා.”

අධ්‍යාපන අමාත්‍ය දිනේෂ් ගුණවර්ධන, රාජ්‍ය අමාත්‍යවරුන් වන පියල් නිශාන්ත, ජයන්ත සමරවීර, පාර්ලිමේන්තුවේ අධ්‍යාපන උපදේශක කාරක සභිකයින් වන යදාමිණී ගුණවර්ධන, අනූප පැස්කුවල්, පාර්ලිමේන්තු මන්ත්‍රී සංජිව එදිරිමාන්න ඇතුළු පළාතේ මහජන නියෝජිතයන්, අමාත්‍යංශ ලේකම් මහාචාර්ය කපිල පෙරේරා යන මහත්වරු ද මෙම අවස්ථාවට එක්වූහ.