(අංජුල මහික වීරරත්න)

එකතු කළ අගය මත බදු (vat) ක්‍රමය ප්‍රතිසංස්කරණය කිරීමටත් සරල කරන ලද එකතු කළ අගය මත බදු ක්‍රමය අහෝසි කිරීමටත් කැබිනට් අනුමැතිය ලැබී තිබේ.

ජාත්‍යන්තර මූල්‍ය අරමුදල විස්තීරණ අරමුදල් පහසුකම් වැඩසටහන අනුව එකතු කළ අගය මත බද්ද සම්බන්ධයෙන් ප්‍රධාන ප්‍රතිසංස්කරණ දෙකක් හඳුන්වා දිය යුතුව තිබෙන අප රජය පවසයි.

එකතු කළ අගය මත බදු නිදහස් කිරීම් වලින් බහුතරයක් ඉවත් කිරීමටත් එකතු කළ අගය මත බදු ආපසු ගෙවීම සඳහා වඩාත් විධිමත් ක්‍රමයක් හඳුන්වා දෙමින් දැනට ක්‍රියාත්මක වන සරළ කරන ලද එකතු කළ අගය මත බදු ක්‍රමවේදය 2024 ජනවාරි පළවෙනිදා සිට ක්‍රියාත්මක වන පරිදි අහෝසි කිරීමට හැකිවන පරිදි එකතු කළ අගය මත බදු පනතේ අදාළ විධිවිධාන සංශෝධනය කිරීමටත් ඒ සඳහා පනත් කෙටුම්පතක් සකස් කරන ලෙස නීති කෙටුම්පත් සම්පාදකට උපදෙස් දීමටත් කැබිනට් අනුමැතිය ලැබී ඇත.