(විමුක්ති එස් රුද්‍රිගු)

බංග්ලාදේශයේ ඇඟලුම් අංශය ගැඹුරු අර්බුදයකට ඇද වැටෙන ලකුණු පෙන්නුම් කරමින් පසුගියදා අශුලියා නගරයේ වසා දැමුණු ඇඟලුම් කම්හල් 219 න් 20 ක් හැර අනෙකුත් සියලුම කර්මාන්තශාලා සිය මෙහෙයුම් කටයුතු අද (15) නැවත වරක් ආරම්භ කළේය.

ඇඟලුම් කම්හල් සේවකයන් ප්‍රචණ්ඩකාරීව හැසිරෙමින් නොසන්සුන්කාරීව හැසිරීම හේතුවෙන් පසුගිය 12 වැනිදා අශුලියා නගරයේ ඇඟලුම් කම්හල් 133 ක් තාවකාලිකව වසා දැමුණු අතර තවත් 86 ක් කම්කරු පනත යටතේ ස්ථිර වශයෙන් වසා දැමුණේය. තාවකාලිකව වසා දැමුණු කම්හල් 133 නිවාඩු දින ප්‍රකාශයට පත් කරමින් වසා දැමුණු අතර ඉතිරි 86 සේවකයන්ගේ අසාධාරණ ඉල්ලීම පෙන්වා දෙමින් කම්කරු පනත යටතේ ස්ථිර වශයෙන් වස දැමුණේය.

එම අවස්ථාවේ නොසන්සුන්තාවය කඩාකප්පල්කාරීන්ගේ ක්‍රියාවක් බවට බලධාරීන් මත පළ කළේය. කෙසේ වෙතත් අන්තර්වාර රජයේ බලධාරීන් කම්හල් හිමියන් සමඟ පැවැති සාකච්ඡාවක ප්‍රතිඵලයක් ලෙස වසා දැමුණු කම්හල්වලින් 20 ක් හැර ඉතිරි කම්හල් සියල්ල ඊයේ(15) උදෑසන 8 වනවිට රාජකාරි කටයුතු ආරම්භ කළ අතර උදෑසන 11 වනවිටත් එහි කිසිඳු ප්‍රචණ්ඩකාරී සිදුවීමක් වාර්තාවී නොතිබිණි. තවමත් වසා දමා ඇති කම්හල් 20 න් 18 ක් ස්ථිර වශයෙන් වසා දැමුණු කම්හල්වලට අයත්ය.

අශුලියා නගරය ඇඟලුම් කම්හල් 407 කට නිවහන වේ.