(සමන් පාලිත නානායක්කාර) 

පවතින මහ වැසි සමග නාය යාමේ අවදානමක් මතුවී ඇති බැවින් හපුතලේ ප්‍රාදේශීය ලේකම් කොට්ඨාසයේ තංගමලේ  ග්ලැනෝර් වත්තේ  පවුල් තිස් දෙකක් අද( 20 ) ආරක්ෂිතව ඉවත් කළ බව හපුතලේ ප්‍රාදේශීය ලේකම් ගයානි කේ රණතුංග මහත්මිය කීවාය. 

 ග්ලැනෝර් වත්තේ  අංක 10 නිවාස පේලියේ සහ අවට තවත් නිවාසවල පදිංචිව සිටි පවුල් 32ක සාමාජිකයින් අසූ නම දෙනෙකු මෙලෙස ඉවත් කර තිබේ. 

 මෙසේ ඉවත් කළ පවුල් 32ක පුද්ගලයින් ග්ලැනෝර්  මහා විදුහලේ තාවකාලික කඳවුරක රඳවා ඇති බවද ප්‍රාදේශීය ලේකම් තුමිය කීවාය.

 ජාතික ගොඩනැගිලි පර්යේෂණ ආයතනය මෙම ප්‍රදේශයේ සිදුකළ භූමි  පරීක්ෂණයකදී ජල පහරවල් මතුවීම හා  භූමිය ගිලාබැසීම් නිරීක්ෂණය කිරීමත් සමඟ නායයාමේ  පූර්ව ලක්ෂණ ඇති වී ඇති බැවින් කඩිනමින් මෙම පවුල් ඉවත් කිරීමට  අද දින නිර්දේශ  ලබාදී තිබේ.

 මේ අතර හල්දුම්මුල්ල ප්‍රාදේශීය ලේකම් කොට්ඨාසයට අයත් බෙරගල බ්ලැක්වුඩ්  විද්‍යාලයට ඉහළ කන්දේ බුරුල්ව ගල් පර්වත කීපයක්   විදුහල් ගොඩනැගිලි වලට  පෙරළීමේ    අවදානමක් මතුවී ඇති බැවින් එම පාසලේ දූ දරුවන් හෙට 21 හල්දුම්මුල්ල දෙමළ මහා විදුහලේ වෙන් කරගත් වෙනම ශාලාවක ඉගැන්වීම්  කටයුතු සිදු කිරීමට සැලසුම් කර ඇති බව හල්දුම්මුල්ල කොට්ඨාස අධ්‍යාපන අධ්‍යක්ෂක නිලානි ධම්මිකා මහත්මිය කීවාය.