(ඩයනා උදයංගනී)

රාජ්‍ය අමාත්‍ය ඩයනා ගමගේ මහත්මිය මෙරට මෙන්ම බ්‍රිතාන්‍ය නීතියට ද විරුද්ධව කටයුතු කර ඇති බැවින් ඇය සම්බන්ධයෙන් අපරාධ පරීක්‍ෂණයක් පවත්වන්නැයි ඉල්ලා මෙරට සමාජ ක්‍රියාකාරීන් පිරිසක් බ්‍රිතාන්‍යයේ චාල්ස් රජු වෙත ලිපියක් යොමු කර ඇත.

‘එස්.එල් දේශය’ යූ ටියුබ් නාලිකාව නියෝජනය කරමින් සමාජ ක්‍රියාකාරී දර්ශන හඳුන්ගොඩ මහතා ඇතුළු පිරිසක් මෙම ලිපිය යොමු කර ඇති අතර, ඔවුහු බ්‍රිතාන්‍ය මහ කොමසාරිස් කාර්යාලය වෙත අද (28) ගොස් එම ලිපිය භාරදුන්හ.

ඩයනා ගමගේ මන්ත්‍රීවරියගේ මන්ත්‍රීධූරය අහෝසි කරන ලෙස ඉල්ලා අධිකරණයෙහි නඩුවක් පවරා ඇති ඕෂල හේරත් මහතා ද මෙම අවස්ථාවට එක්ව සිටියේය.

බ්‍රිතාන්‍යයේ පුරවැසිභාවය හිමි ඩයනා ගමගේ මහත්මිය සංචාරක වීසා මත මෙරටට පැමිණ, ව්‍යාජ හැඳුනුම්පත් සහ ගුවන් ගමන් බලපත්‍ර ලබාගෙන ශ්‍රී ලංකා පුරවැසියකු ලෙස පෙනී සිටිමින් රජයේ තනතුරු දැරීම සහ මැතිවරණවලට පෙනී සිටීම මෙරට මෙන්ම බ්‍රිතාන්‍ය නීතියට ද පටහැනි බැවින් ඇය ගැන පරීක්‍ෂණයක් පවත්වන ලෙස තම ලිපිය මගින් චාල්ස් රජතුමාගෙන් ඉල්ලීමක් කර තිබෙන බව සමාජ ක්‍රියාකාරී දර්ශන හඳුන්ගොඩ මහතා පැවසීය.

වීසා කාලය අවසන්ව ඇති ඩයනා ගමගේ මහත්මිය මේ වන විට මෙරට රැඳී සිටින්නේ ද නීති විරෝධීව බව ඔහු සඳහන් කළේය.