(ඩයනා උදයංගනී)

විදෙස් ගමන් බලපත්‍ර නිකුත් කිරීමේ එක්දින සේවාව ලබන සඳුදා (4) සිට තවත් දිස්ත්‍රික්ක තුනක දී ලබාගත හැකිබව ආයෝජන ප්‍රවර්ධන අමාත්‍ය ධම්මික පෙරේරා මහතා පැවසීය.

ඒ අනුව මාතර, මහනුවර සහ වව්නියාව යන නගරවල පිහිටි ආගමන විගමන දෙපාර්තමේන්තු කාර්යාලවලින් ලබන සඳුදා සිට එක්දින සේවාව යටතේ විදෙස් ගමන් බලපත්‍ර නිකුත් කිරීම ආරම්භ කරන බවයි අමාත්‍යවරයා ප්‍රකාශ කළේය.

ශ්‍රී ලාංකිකයින් සමග විවාහ වූ විදේශිකයින්ට මෙරටදී මෙතෙක් ලැබුණු වසරක වීසා කාලය වසර 5 දක්වා දීර්ඝ කරන බව ද ධම්මික පෙරේරා මහතා කීවේය.

ආයෝජන ප්‍රවර්ධන ගරු අමාත්‍ය ධම්මික පෙරේරා මහතා අද (29) ආගමන විගමන දෙපාර්තමේන්තුවේ හදිසි නිරීක්ෂණ චාරිකාවකට එක්වූ අතර, එහි සේවය ලබා ගැනීමට පැමිණෙන මහජනතාව මුහුණ දෙන ගැටලු විසඳීම සඳහා මෙම පියවර ගන්නා බව ද පැවසීය.

විදෙස් රැකියා සඳහා යාමට ලියකියවිලි සම්පූර්ණ කරගෙන ඇති පුද්ගලයින්ට කඩිනමින් විදෙස් ගමන් බලපත්‍ර ලබාදීමට බත්තරමුල්ල, සුහුරුපායේ පිහිටි ආගමන විගමන දෙපාර්තමේන්තුවේ පිහිටි ප්‍රධාන කාර්යාලයේ වෙනම කවුන්ටරයක් විවෘත කරන බව ද අමාත්‍ය ධම්මික පෙරේරා මහතා කීවේය.

ඒ අනුව අදාළ ලේඛන ඇති අයට සාමාන්‍ය පෝලිමෙහි නොසිට මෙම විශේෂ කවුන්ටරයට ගොස් ඉක්මනින් විදෙස් ගමන් බලපත්‍ර ලබාගැනීමට හැකි බවයි අමාත්‍යවරයා සඳහන් කළේය.

විදෙස් ගමන් බලපත්‍ර සඳහා අනුමත ඡායාරූප ශාලාවලින් ලබාගන්නා ඡායාරූප ආගමන විගමන දෙපාර්තමේන්තුවේ දත්ත පද්ධතියට යොමු කිරීමේදී උද්ගත වී ඇති ගැටලුවට දිගු කාලීන විසඳුමක් සොයාගන්නා තෙක් තම පුද්ගලික මුදලින් රුපියල් ලක්ෂ 9ක් වැයකර එම දෙපාර්තමේන්තුව වෙත කුලී පදනම මත ඡායාරූප යොමුකිරීමේ දත්ත පද්ධතියක් (ිැරඩැර) ලබාදීමට ද ඇමතිවරයා පියවර ගෙන ඇත.

මෙරටට පැමිණෙන සංචාරකයින් සංඛ්‍යාව ලබන සඳුදා (4) සිට ට්විටර් සමාජ මාධ්‍ය ජාලය ඔස්සේ දිනපතා ප්‍රකාශ කළ යුතු බවත්, ඒ අනුව පෙර දින පැමිණි සංචාරකයින් සංඛ්‍යාව ලබන සඳුදා සිට සෑම දිනකම උදෑසන 9.00 ට ආගමන විගමන දෙපාර්තමේන්තුවේ ට්විටර් ගිණුම ඔස්සේ නිවේදනය කෙරනු ඇති බවත් ඇමතිවරයා කීය.

ධම්මික පෙරේරා මහතා අමාත්‍යධුරයට පත්වීමට පෙර රජයට යෝජනා කළ ”ස්වර්ණමය පාරාදීසය” වීසා වැඩසටහන ඔස්සේ මෙරටට විදේශ විනිමය ගෙන්වා ගැනීම තවමත් ප්‍රමාද වෙමින් පවතින බව කී ඇමතිවරයා එම මුදල් තැන්පතු භාරගැනීම සඳහා ශ්‍රී ලංකා මහබැංකුව විසින් වාණිජ බැංකුවලට තවමත් අනුමැතිය ලබා නොදීම ඊට හේතුවී ඇතැයි කීය.

මේ සම්බන්ධයෙන් මහබැංකු නිලධාරීන් සමග සාකච්ඡා කර කඩිනමින් විසඳුමක් ලබාදීමට ක්‍රියාකරන බව ධම්මික පෙරේරා මහතා සඳහන් කළේය.