කාන්තාවෝ තම රූසපුව අලංකරණය සඳහා බොහෝ වෙහෙසෙති. මුහුණ, දෙතොල්, වරලස සේම ඇස් දෙකද අලංකාරව තබා ගැනීමත් රූපලාවන්‍යයේ විශේෂිත කොටසකි. ඒ උදෙසා යෞවනියන් සේම කාන්තාවෝද ඇස් අලංකරණය පවත්වා ගැනීමට ඉතා කැමැතිය.

නිරෝගී ඇස් දෙකක්

නිරෝගී ඇස් දෙකක් යනු අලංකාරයම පමණක් නොව පෙනීමද ආරක්ෂා වූ නෙත් යුවළකි. එවන් ඇස් දෙකක් පුද්ගලයකුට කෙතරම් වටිනවාද? අපේ පරමායුෂ දක්වාම එදිනෙදා වැඩ කටයුතු බාධාවක් රහිතව කර ගැනීමට ඇස්වල පෙනීම අත්‍යවශ්‍යයි. නිරෝගී ඇස් දෙකකට පෙනීම රකින, පෙනුම වර්ධනය කරන ආහාර පාන සේම ඇස් සම්බන්ධව අප බාහිරින් සිදු කරන වැරැදි පුරුදුවලින්ද මිදිය යුත්තෙමු.

නිෂ්පාදනවල අඩංගු දේවල්

දෙඇස් අලංකාර කිරීමට යොදා ගැනෙන මෙම මේකප් වර්ග, දියර වර්ගවල සංයුතිය රසායනික ද්‍රව්‍ය ගණනාවකගේම සංයෝගයකි. අද වනවිට ජලයට පවා මැකී නොයන ඇස් ආලේපන වර්ග බොහොමයකි. ඒ බොහොමයකම රසායනික සංයුතිය ඒ තරමටම ඉහළය. මෙම රසායනික අපේ සමට කෙතරම් හිතකරද යන්න මූලික ගැටලුවයි. විශේෂයෙන් මේවා ඇස්වලට යොදන බැවින් අප බෙහෙවින් සැලකිලිමත් විය යුතුමයි.

ඇස්වල පෙනීම රැක ගැනීම ප්‍රධානයි

ඇස් හැඩ කරන සියලුම නිෂ්පාදනවල ප්‍රමිතිය ගැන ඔබේ අවධානය යොමු කරන්න. ප්‍රමිතියකින් තොර නිෂ්පාදන නිසා ඇහේ පෙනුම පවා නැති වීමට ඉඩ ඇත. ඇස් යට අලංකරණයේදී ඇසේ මුල සිට පැන්සලින් හැඩ ගැන්වෙන අවස්ථා දැක ඇත.

ඇසේ කොණ වැනි ඉතාම සංවේදී කඳුළු උණන තැන් මෙයාකාරයට අවහිර කිරීම ඉන් සිදු වේ.

මෙය අඛණ්ඩව සිදු වීම නිසා ඇස් ඉදිමිය හැකියි. ආසාදනයකට පවා ලක්වීමට ඉඩ ඇත. ඇස් හැඩ ගැන්වීමෙහි කිසිඳු වරදක් නැති අතර ඉතා සියුම් මෙවන් තැන් අවහිර නොවනා ආකාරයට ඔබ කටයුතු කළ යුතුයි.

ඇස් ආලේපන ඉවත් කිරීමේදී පවා ඇස් ඇතුළට ඒවා නොයන සහ නොවැටෙන පරිදි මෘදුව පිස දැමීමෙන් පසු ගැල්වූ දෑ පිරිසුදු ජලයෙන් සෝදා හැරිය යුතුය.

පිටස්තර පුද්ගලයකු වෙතින් ඇස් අලංකරණ කටයුතු සිදු කර ගැනීමේදී ඇස් තුළට කිසිඳු ද්‍රව්‍යයක් නොවැටෙන, නොවදින ලෙස සිදු කර ගන්න. එය ඔබේ දෘෂ්ටි කෝණයට සෘජුවේම බලපානු ලැබේ. සාමාන්‍යයෙන් eye liner සඳහා ඉටි, තෙල්, සිලිකොන් බහුලව යොදා ගැනෙන අතර දිගුකල් භාවිතය සුදුසු නැත.

ඇස් දෙකේ බාහිර ලස්සන මෙන්ම පෙනීම රැක ගැනීමේ වගකීමද උදෙසා අපි මෙතෙක් කළ වැරැදි පුරුදුවලින් මිදිය යුතුවෙමු.

-සටහන- මාධවී ධර්මරත්න