(කේ. බුද්ධික කුමාරසිරි)

ඇට මිදුළු හි පිළිකා රෝගයෙන් පෙලෙන කුඩා දරුවන්ගේ ශල්‍යකර්ම මෙරටදී සම්පූර්ණයෙන්ම නොමිලේ සිදු කිරීමේ හැකියාව  අපේක්ෂා රෝහලේ පවතින බව ළමා පිළිකා ඇට මිදුළු බද්ධ ඒකකයේ ප්‍රධානී විශේෂඥ වෛද්‍ය ප්‍රභානි මද්දුමආරච්චි මහත්මිය අද (25) පැවසුවාය.

මෙයට පෙර අදාල ශල්‍යකර්මය සදහා ඉන්දියාව හෝ වෙනත් විදේශ රටකට රුපියල් ලක්ෂ සියයත් ලක්ෂ තුන් සියයත් අතර වියදමක් දරමින් රෝගීන් රැගෙන යාමට සිදු වූ බවත් ඇය පැවසුවාය.

ඇය මෙම කරුණු සදහන් කරන ලද්දේ ජාතික අපේක්ෂා රෝහලේ සංවර්ධන කමිටුවේ සම්බන්ධීකරනයෙන් රැපියල් කෝටි එකහාමාරකට ආසන්න වටිනාකමෙන් යුත් අධි සංවේදී අල්ට්‍රා සවුන්ඩ් ස්කෑන් යන්ත්‍රයක් එම ඒකකයට පරිත්‍යාග කිරීම වෙනුවෙන් පැවැති වැඩසටහනකින් අනතුරුවය.

පිළිකා රෝගී දරුවන් සිව් දෙනෙකු පමණ එක් මසකට ශල්‍යකර්මය සදහා කටයුතු කරන බවත් ඉකුත් වසරේ නොවැම්බර් මාසයේදී වැඩ කටයුතු ආරම්භ කළ මෙම ඒකකය මගින් මේ වනවිට දරුවන් හය දෙනෙකුට ඇට මිදුළු බද්ධ කිරීමේ ශල්‍යකර්ම සිදු කර ඉතා හොද තත්වයේ සිටින බවද මෙහිදී වැඩි දුරටක් අදහස් දැක් වූ විශේෂඥ වෛද්‍ය ප්‍රභානි මද්දුමආරච්චි මහත්මිය පැවසුවාය.