(අංජුල මහික වීරරත්න)

ආණ්ඩුව ජනතා ප්‍රශ්න විසඳනවා වෙනුවට කරන්නේ රනිල් වික්‍රමසිංහ හිටපු ජනාධිපතිවරයාට දෝෂාරෝපණය කරමින් සිටීම බව එක්සත් ජාතික පක්ෂ සභාපති වජිර අබේවර්ධන මහතා පැවසීය.

රනිල්ට දොස් පැවරීමෙන් රටේ උද්ගත වී තිබෙන ප්‍රශ්නවලට පිළිතුරු නොලැබෙන බවද අබේවර්ධන මහතා කීය.

ගාල්ල උළුවිටිකේ එක්සත් ජාතික පක්ෂ දිස්ත්‍රික් කාර්යාලයේ එජාප ක්‍රියාකාරී හමුවකට එක් වෙමින් වජිර අබේවර්ධන මහතා මේ බව සඳහන් කළේය.

මේ මස 25 සහ 26  දින දෙකේ ගාලු දිස්ත්‍රික්කයේ ආසන සියල්ලම ආවරණය වන පරිදි  බලමණ්ඩල රැස්වීම් පවත්වන බව කී එජාප සභාපතිවරයා ඉදිරියට මොන වගේ කාලයක් උදා වේදැයි ජනතාව තමාගෙන් ප්‍රශ්න කරන්නේ යැයිද ඒ ගැන අමුතුවෙන් කිව යුතු නැති අතර රට යන දිශාව ගැන ජනතාවට හොඳින් පෙනෙන්නට තිබෙන බව පැවසීය. පාර්ලිමේන්තුවට අත්දැකීම් සහිත පිරිසක් යවන්නැයි රනිල් වික්‍රමසිංහ හිටපු ජනාධිපතිවරයා පුන පුනා කීවේ මේ හේතුව නිසා බවද වජිර අබේවර්ධන මහතා කීය.