(සුරංග රාජනායක)

ගම්පොළ අම්බුලුවාව ජෛව විවිධත්ව සංකීර්ණයේ ඉදිකිරීමට යෝජිත කේබල් කාර් ව්‍යාපෘතිය සඳහා පළමු අදියරේ අත්තිවාරම සැකසීම සඳහා අවසරයකින්  තොරව පස් කයන යන්ත්‍රයකින් පස් කපමින් සිටි ආයෝජන සමාගමක වැඩ පරික්ෂකවරයකු රියදුරකු හා පස් කපන යන්ත්‍රයක් ගම්පොළ උඩපළාත ප්‍රාදේශීය ලේකම් ආත්මා දිල්රුක්ෂි ජයරත්න මහත්මියගේ නියමයෙන් සිය බාරයට ගත් බව පොලිස් විශේෂ කාර්ය බළකා ගම්පොළ කඳවුර නිලධාරීහු පවසති.

මෙරට සංචාරක කර්මාන්තය ඉලක්ක කර ගනිමින් ගම්පොළ දුම්රිය ස්ථානයේ සිට කඳු කීපයක් පසුකර අම්බලුවාව කඳු මුදුන යා කරමින් මෙම කේබල් කාර් ව්‍යාපෘතිය ඉදිකරන අතර ඒ සඳහා මූලික අදියර සඳහා රුපියල් බිලියන එකයි දශම දෙකක් ඇස්තමේන්තු කර තිබේ.

ඇමරිකාව චීනය යන රටවල සමාගම් දෙකක් හා මෙරට සමාගමක් සමග අම්බලුවාව භාරකාර මණ්ඩලය මෙම ව්‍යාපෘති සඳහා මුදල් ආයෝජනය කොට තිබේ.

මේ පළමු අදියර යටතේ අම්බලුවාව කඳු මුදන තුළ මීටර 18ක් යට ගලවිද කණු ඉදිකිරීම ආරම්භ කර තිබුණි.

ආයෝජන මණ්ඩලය යටතේ ක්‍රියාත්මක මෙම ව්‍යාපෘතිය සඳහා ආයතන 18ක අවසර පත් ලබාගෙන ඇතැයි සඳහන් වුවද ග්‍රාම නිලධාරී ප්‍රාදේශීය ලේකම් හා භූවිද්‍යා අංශ මඟින් පස් කැපීම සඳහා නිසි අවසරය ලබා ගැනීම සිදුකර නැතැයි චෝදනා එල්ල කරමින් මෙම වැටලීම සිදු කර තිබේ.