ජනාධිපති ආරක්ෂක අංශයට අනියුක්ත කර සිටි හමුදා පිරිස් අප්‍රේල් 30 වැනි දා සිට ඉවත් කර ඇතැයි   යුද හමුදා බ්‍රිගේඩියර් ජී වී රවිප්‍රිය දන්වා ඇත.

යුද හමුදා මූලස්ථානයේ උපදෙස් මත එම හමුදා පිරිස් විසුරුවා ඔවුන් මුලින් සිටි හමුදා ඒකක වෙත මුදා හැර ඇතැයි ද ඔහු කියයි.

ජනාධිපති ආරක්ෂක අංශයේ හමුදාවේ 1200ක් සිටියහ.

මෛත්‍රීපාල සිරිසේන මහතා පසුගිය ජනවාරි අට වැනි දා ජනපති වීමෙන් පසු ඔහුගේ ආරක්ෂාව වෙනුවෙන් සිටි ප්‍රමාණය බෙහෙවින් අඩු කළේය.

මහින්ද රාජපක්ෂ හිටපු ජනපති සමයේ යුද හමුදාව ද බහුල වශයෙන් ජනාධිපති ආරක්ෂක අංශයට යොදා ගනිමින් 3000කටත් වැඩි පිරිසක් ජනාධිපති ආරක්ෂක අංශයට අනුයුක්ත කර ගනු ලැබ සිටියහ.

ජනාධිපති සිරිසේන මහතා අඟුනකොලපැලැස්සේ ශ්‍රී ලංකා නිදහස් පක්ෂ රැස්වීමකට සහභාගී වෙමින් සිටිය දී නාමල් රාජපක්ෂ මහතාගේ ආරක්ෂාවට ගිය බව කියන හමුදා කෝප්‍රල්වරයෙක් අවියක් සමඟ සොයා ගැනීමට පොලිස් විශේෂ කාර්ය බළකාය සමත් විය.

ඔහු ජනාධිපති ආරක්ෂක අංශයට බාර දුන් නමුත් ඔහු මුදා හැර තිබිණි.

මාධ්‍ය මගින් මේ පුවත වාර්තා වීමත් සමග රහස් පොලිසිය පරීක්ෂණ අරඹා එම කෝප්‍රල් රිමාන්ඩ් කරනු ලැබීය.