(ගයාන් සූරිය ආරච්චි)

හිටපු පොලිස්පති සීඩී වික්‍රමරත්න මහතාගේ දේහය පිළිබඳ අවසන් කටයුතු අද (20) සවස බොරැල්ල කනත්තේදී සිදු කෙරිණි.

අවමංගල සභාව අද පස්වරු 2.00 ට පමණ ආරම්භ කෙරුණු අතර කොළඹ හුණුපිටිය ගංගාරාම විහාරාධිපති කොළඹ නව කෝරළයේ ප්‍රධාන සංඝනායක ආචාර්ය කිරින්දේ අස්සජි නාහිමියන්, රැවන්වැලි මහා සෑයේ හිමි ඊතල වැටුණු වැවේ ඥානතිලක නාහිමි පිටිදුවේ සිරිධම්ම නාහිමි ඇතුළු මහා සංඝරත්නය පාංශකූලය ලබා දුන්හ.

අනතුරුව අවමංගල සභාව වෙනුවෙන් ගුණකථනයන් කීපයක් සිදු කෙරුණු අතර පසුව දේහය පොලිස් ආචාර පෙළපාලි සහිතව බොරැල්ල කනත්ත වෙත රැගෙන යනු ලැබීය.

පසුව ඥාතීන්ගේ සෝ සුසුම් මැද පොලිස් අවසන් ගෞරව පිරිනැමීමෙන් පසු හිටපු පොලිස්පතිවරයාගේ දේහය භූම දානය කෙරිණ.

(සුමුදු හේවාපතිරණ)