(සුජිත් හේවාජුලිගේ)

සිවිල් ආරක්ෂක දෙපාර්තමේන්තුව භටයන්  9760ක්   අමාත්‍ය මණ්ඩල තීරණයට පටහැනිව වෙනත් බාහිර රාජකාරී කටයුතු සදහා යොදවා අැතැයි ජාතික විගණන කාර්යාලය නිකුත් කළ අලුත්ම වාර්තාවක සදහන් වේ.

ආගමික ස්ථාන ආරක්ෂක රාජකාරී කටයුතු සඳහා භටයන් 307ක්ද  ආගමික ස්ථාන සුභසාධක හා නඩත්තු කටයුතු සඳහා 1344 ක්  සහ ආගමික ස්ථාන රියදුරු රාජකාරී සඳහා භටයන් 139ක් ඇතුළුව භටයන් 1790 ක  ප්‍රමාණයක් ආගමික ස්ථානවල විවිධ රාජකාරී කටයුතු සඳහා යොදවා තිබූ බවද එහි දැක්වේ.

අනුමැතිය ලබාදී තිබුණේ    ආගමික සිද්ධස්ථාන ආදියෙහි සුළු හා මධ්‍ය පරිමාණ ඉදිකිරීම් කටයුතු සඳහා  පමණක්  බව සදහන් වේ.


මෙම පිරිසට   පසුගිය වසරේදී වැටුප් ලෙස කෝටි 107 කට වැඩි මුදලක් ගෙවා  අැත

සිවිල් ආරක්ෂක දෙපාර්තමේන්තුව ආදායම් ඉපදවීමේ ආයතනයක් බවට පරිවර්තනය කළ  යුතු බව සඳහන් වුවද පසුගිය වසරේ ඉදිකිරීම් කටයුතු සඳහා අනුයුක්ත කරන ලද භටයන් 831 ක්   සපයන ලද  එම සේවා  වෙනුවෙන් රජයට අයවිය යුතු මුදල දෙපාර්තමේන්තුව  අදාළ ආගමික ස්ථානවලින් අය කර ගැනීමට  කටයුතු කර නොතිබූ බවද  වාර්තාව සඳහන් කරයි.

මෙම පිරිස සඳහා 2025 වර්ෂයේදී වැටුප් ලෙස කෝටි පනහකට ආසන්න මුදලක් ගෙවා තිබිණැයි විගණන නිලධාරීහු පවසති.

මේ අතර කිසිදු නීතිමය ප්‍රතිපාදනයක් නොමැතිව දෙපාර්තමේන්තුවේ භටයන් 4456 ක් 2025/2026මහ කන්නයේදීද භටයන්  3515ක් යල කන්නයේදීද  වී ගොවිතැන් කටයුතු සඳහා මාස හතර  කාලයකට මුදා හැර තිබිණ. එම භටයන්ට වැටුප් ලෙස පිළිවෙලින්  රුපියල් කෝටි 89කට වැඩි මුදලක් හා රුපියල්  කෝටි 70කට වැඩි මුදලක් ගෙවා තිබූ බව වාර්තාවේ    දැක්වේ

මේ අතර 2023 සහ 2024 වර්ෂවලදී ආරම්භ කර අවසන්ව තිබූ ව්‍යාපෘති 17ක අපේක්ෂිත අස්වැන්න කිලෝ ග්‍රෑම් 195525 ක්  හා සත්‍ය අස්වැන්න කිලෝ ගෑම් 88385 ක් වූ අතර  අහිමිවූ  අස්වනු ප්‍රමාණය කිලෝ ග්‍රෑම් 107140ක් විය. ඒ අනුව අස්වනු  අහිමි වීමේ ප්‍රතිශතය සියයට  55කි.

තවත්  ව්‍යාපෘති දෙකකින් අපේක්ෂිත ආදායම රුපියල්  7076664ක් හා සත්‍ය ආදායම රුපියල් 5613100ක් විය. ඒ අනුව මෙම අපේක්ෂිත අස්වනු හා අපේක්ෂිත  ආදායම් ළඟා කර නොගැනීම පිළිබඳව දෙපාර්තමේන්තුවේ ව්‍යාපෘති අංශය පරීක්ෂණ පවත්වා හානි සිදුවී ඇද්ද යන්න සෙවීම මෙන්ම  හානි සිදුවී ඇත්නම් ඒ සඳහා මුදල් රෙගුලාසි ප්‍රකාරව ඉදිරි පරීක්ෂා කිරීමේ   කටයුතු කර නොතිබූ බව  එම වාර්තාව සඳහන් කරයි.

දෙපාර්තමේන්තුවේ  ධාවනයට නුසුදුසු ලෙස හඳුනාගත් රථවාහන  178ක් පැවතුන අතර එම රථ වාහන අලුත් වැඩියා කටයුතු සඳහා යොමු කර නැවත භාවිතයට ගැනීමට හෝ නියමිත කාලවකවානුවලදී අපහරණය කිරීමෙන් රජයට ප්‍රතිලාභ ලබාගත හැකිව තිබූ නමුත් දෙපාර්තමේන්තුව එවැනි පියවරක් අනුගමනය කර නොතිබූ බව ජාතික විගණන කාර්යාලය පවසයි.

දෙපාර්තමේන්තුවේ ධාවනයට සුදුසු වාහන අතරින් දුම් සහතික  නොගත් වාහන සංඛ්‍යාව 246ක් බවද එම වාර්තාවේ දැක්වේ.

පසුගිය වර්ෂයට අදාලව  වාහන 74 ක ආදායම් බලපත්‍ර ලබාගෙන නොතිබූ බව එහි වැඩිදුරටත්   සඳහන්වේ.

මෙම තොරතුරු සඳහන් වන්නේ සිවිල් ආරක්ෂක  දෙපාර්තමේන්තුවේ 2025 වාර්ෂික වාර්තාවට ඇතුළත් කරනු ලැබ ඇති විගණන වාර්තාවේය.