දෙමළ ජනතාවට අවාසිදායක වන ආකාරයේ ව්‍යවස්ථාවක් ගෙන ඒමට කිසිවිටක ඉඩ නොතබන බවත් , දෙමළ ජනතාවගේ අර්බුදයට හිමිවිය යුතු දේශපාලන විසදුම මෙරට බහුතර සිංහල ජනතාවද පිළිගන්නා ආකාරයේ එකක් විය යුතු බවත් දෙමළ ජාතික සන්ධානයේ නායක හා  විපක්ෂ නායක ආර් සම්බන්ධන් මහතා   පැවසීය.

2016 වසර කිසිවක් සිදුනොවූ වසරක් ලෙස හැදින්විය නොහැකි බවත් මේ වසර තුළ ආණ්ඩුක්‍රම ව්‍යවස්ථා සංශෝධනය ඇතුළු කරුණු කාරණා රැසක් සම්බන්ධයෙන් ප්‍රගතශීලීත්වයක් දක්නට ලැබූ වසරක් බවත් විපක්ෂනායක වරයා   සදහන් කළේය.

‘‘මේ වන විට වඩාත් ප්‍රගතශීලී කටයුතු රැසක් මෙරට තුළ සිදුවෙනවා. මෙය අවුල් කිරීමට අප කැමති නැහැ.  අප අවස්ථා ගණනාවකදීම දකුණේ දේශපාලන නායකයින් හමුවී සාකච්ඡා කළා.මෙහිදී ඒකීය රාජ්‍ය දේශපාලන විසදුමක් බලාපොරොත්තු නොවන බවට අවස්ථා ගණනාවකදීම පෙන්වා දුන්නා. අප කියන්නේ අප ජනතාව පිළිගන්නා සාධාරණ දේශපාලන විසදුමක් ලබා දෙන්න කියලයි.

විශේෂයෙන් දෙමළ ජනතාවගේ අර්බුදයට හිමිවිය යුතු දේශපාලන විසදුම මෙරට බහුතර සිංහල ජනතාවද පිළිගන්නා ආකාරයේ එකක් විය යුතුයි.එය විශේෂයෙන් ප්‍රකාශ කළ යුතුයි.සිංහල ජනතාවගේද පිළිගැනීමට ලක්වන ආකාරයේ විසදුමක් ලැබේවි යැයි මා විශ්වාසයෙන් පසුවෙනවා.

පසුගිය 2015 ජනවාරි අට වනදා පැවති ජනාධිපතිවරණයෙන් මෛත්‍රීපාල සිරිසේන මහතා ජනාධිපතිධූරයට පත්වීමෙන් පසු දීර්ඝ කාලයක සිට විසදුමක් හිමි නොවුනු ජාතික ප්‍රශ්නය එනම් උතුරු නැගෙනහිර ජනවාර්ගික අර්බුදයට ස්ථීර දේශපාලන විසදුමක් මේ වසර අවසන් වන්නට පෙරාතුව ගෙනඑන බව මා විසින් විශ්වාසයෙන් යුතුව ප්‍රකාශ කළා.මෛත්‍රීපාල සිරිසේන මහතා අග්‍රාමාත්‍යවරයා වශයෙන් රනිල් වික්‍රමසිංහ මහතාව පක්කර ගත්තා.ඉන් අනතුරුව පැවති මහ මැතිවරණයෙන් ජයගනිමින් රනිල් වික්‍රමසිංහ මහතා නැවතත් අගමැති ධූරයට පත්වුනා.අනතුරුව ජනපතිගේ නායකත්වයෙන් යුත් ශ්‍රීලංකා නිදහස් පක්ෂයත් අගමැතිවරයාගේ නායකත්වයෙන් යුත් එක්සත් ජාතික පක්ෂයත් එක්වී මේ වන විටත් ජාතික ආණ්ඩු පාලනයක් ගෙන යනවා.එජාපයට අපගේ සහායෙන් තුනෙන් දෙකක බලයක් හිමිකර ගනිමින් ජාතික ආණ්ඩු පාලනයක් ගෙන යාමට අවස්ථාව තිබුණා.එසේ වූයේ නැහැ.

කෙසේ වෙතත් යෝජිත ආණ්ඩුක්‍රම ව්‍යවස්ථා සංශෝධනය සම්බන්ධයෙන් ප්‍රගතහීලී කටයුතු රැසක් සිදුව තිබෙනවා.පාර්ලිමේන්තුවද ආණ්ඩුක්‍රම ව්‍යවස්ථා මණ්ඩලයක් බවට පත්ව තිබෙනවා.ආණ්ඩුක්‍රම ව්‍යවස්ථා මණ්ඩලය විසින් මගපෙන්වීමේ කමිටුවක් පත්කර ගෙන තිබෙනවා.මෙම කමිටුව විසින් අනු කමිටු හයක් පත්කරගෙන තිබෙනවා.එම අනුකමිටු විසින් යොජිත ආණ්ඩුක්‍රම ව්‍යවස්ථාව සම්බන්ධයෙන් සකස් කරන ලද වාර්තා මේ වනවිටත් භාර දී තිබෙනවා.එම වාර්තා ලබන ජනවාරි 09,10,11 තෙදින පාර්ලිමේන්තුවේදී විවාදයට ගැනීමට ද නියමිතව තිබෙනවා.ආණ්ඩුක්‍රම ව්‍යවස්ථාව සම්බන්ධයෙන් සාකච්ඡා කිරීම සදහා මේ වනවිට අවස්ථා 45 කදී ආණ්ඩුක්‍රම ව්‍යවස්ථා මගපෙන්වීමේ කමිටුව රැස්ව තිබෙනවා.මෙනිසා 2016 වසර කිසිවක් සිදුනොවූ වසරක් ලෙස කියන්න බැහැ.ප්‍රගතීලී දෑ රැසක් සිදුව තිබෙනවා.

එමෙන්ම ආණ්ඩුක්‍රම ව්‍යවස්ථාව සම්මත වීමෙන් පසු ඒ සදහා ජනතා කැමැත්ත හිමිවීම අනිවාර්යයි.මෙම ව්‍යවස්ථාව ජනතාව වෙත ඉදිරිපත් කර ජනමත විචාරණයක් සිදුකළ යුතුයි. එම ව්‍යවස්ථාව දෙමළ ජනතාවට අවාසිදායක ආකාරයෙන් සකස් නොවිය යුතුයි. නව ව්‍යවස්ථාවෙන් දෙමළ ජනතාවගේ අයිතිවාසිකම් රැකිය යුතුයි‘