(ඩයනා උදයංගනී)

සේරම කුණු යහපාලන ආණ්ඩුවට දාන්න එපා යැයි හිටපු ජනාධිපති මෛත්‍රීපාල සිරිසේන මහතා පැවසීය.

යහපාලන ආණ්ඩුව රටට කළ දේවල් කියන්නට වෙනම සම්මන්ත්‍රණයක් වුවත් පැවැත්විය හැකි බව මෛත්‍රීපාල සිරිසේන මහතා සඳහන් කළේය.

තම රජය සම්මත කළ පනත් කොපමණද? කළ දේවල් මොනවාද? යන්න අද කවුරුත් කතා නොකරන බවත්, යහපාලනය, යහපාලනය කියමින් ගල් ගැසීම පමණක් සිදුකරන බවත් හෙතෙම කීවේය.

මැතිවරණ සිතියම හැකිළුවේ යහපාලන ආණ්ඩුව නොව ජේ.ආර් ජයවර්ධන මහතා බවද හිටපු ජනාධිපතිවරයා පැවසීය. 'මම මේ රටට 19 වන සංශෝධනයෙන් ප්‍රජාතන්ත්‍රවාදය දුන්න මිනිහෙක්. ලෝකෙ කොයි නායකයද තමන්ගේ බලය ඉවත් කළේ' යැයිද හිටපු ජනාධිපතිවරයා කීවේය.

මෛත්‍රීපාල සිරිසේන මහතා මේ බව පැවසුවේ ශ්‍රී ලංකා නිදහස් පක්ෂ මූලස්ථානයේ දී ඊයේ (2) රාත්‍රියේ පැවති මධ්‍යම කාරක සභා රැස්වීමෙන් පසුව මාධ්‍ය හමුවේ අදහස් දක්වමිනි.