(කේ. බුද්ධික කුමාරසිරි සහ බිමල් ශ්‍යාමන් ජයසිංහ)

සිය අනියම් බිරිද හා එක්ව යතුරු පැදියකින් ගොස් දුරකතන ඇමතුම්වල යෙදෙමින් මහ මග ගමන් ගන්නා පුද්ගලයින්ගේ දුරකතන සොරාගත් පුද්ගලයෙකු සහ ඔහුගේ අනියම් බිරිද බව කියන කාන්තාව ලක්ෂ විස්සක් පමණ වටිනා ස්මාර්ට් දුරකතන තිහක් සමගින් අත් අඩංගුවට ගත් බව කඩුවෙල පොලිසිය පවසයි.

මෙලෙස අත් අඩංගුවට පත්ව ඇත්තේ මොනරාගල ප්‍රදේශයේ පදිංචිකාරියක වන 29 හැවිරිදි කාන්තාවක් සහ ජාඇල ප්‍රදේශයේ පදිංචිකරුවකු වන 27 හැවිරිදි පුද්ගලයෙකි.

සැකකරුවන් ජංගම දුරකතන සොරා ගෙන පලා යාම සදහා භාවිතා කළ යතුරු පැදියද සැකකරුගේ මිතුරෙකුගෙන් සොරා ගෙන තිබූ බවද පොලිසිය පවසයි.

දැඩි ලෙස හෙරොයින් මත්ද්‍රව්‍ය පානයට හුරු වී ඇතැයි කියන මෙම යුවළ හෙරොයින් පානය සඳහා මෙලෙස නවීන ජංගම දුරකතනය සොරාගෙන විකුණා ඇතැයි ද අනාවරණය වී ඇත.
සැකකරුගේ අනියම් බිරිද බව කියන කාන්තාව හෙරොයින් ග්‍රෑම් පහක් සමගින් මාලබේ පිට්ටුගල ප්‍රදේශයේ දී පොලිසිය විසින් පලමුවෙන් ම අත් අඩංගුවට ගෙන ඇති බවත් එහිදී සිදුකළ  ප්‍රශ්න කිරීමේදී මෙම ජංගම දුරකතන සොරකම පිළිබදව අනාවරණය වී ඇත.
අත් අඩංගුවට ගත් සැකකරුගේ නීත්‍යානුකූල භාර්යාව ද කහන්තොට ප්‍රදේශයේ කුලී නිවසක නවත්වා අනියම් බිරිද ද එම ප්‍රදේශයේ ම කුලී නිවසක නවත්වා ගනිම්න් මෙලෙස ජංගම දුරකතන කොල්ලකෑම සදහා අවශ්‍ය අවස්ථාව වලදී කටයුතු කර ඇතැයි කඩුවෙල පොලිසියේ උසස් නිළධාරියෙකු පැවසීය.
සැකකරු ටැටූ ශිල්පියෙකු ලෙස කලක් කටයුතු කර ඇති අතර පසුව මත්ද්‍රව්‍ය වලට ඇබ්බැහි වීමෙන් පසු මෙලෙස සොරකම් සදහා පෙළඹී ඇතැයි ද අනාවරණය වී ඇත.