(යොහාන් භාසුර)

සමනළවැව ජලාශයේ ජල කාන්දු වැසීමට රුපියල් කෝටි 10ක පමණ වියදමක් ඇස්තමේන්තු කර ඇතැයි ලංකා විදුලිබල මණ්ඩලයේ උසස් නිලධාරියෙක් පැවසීය.

එම වැය වාර්තාව විදුලිබල හා බලශක්ති අමාත්‍යංශයට යොමුකර ඇති බව ද එම නිලධාරියා කීය.

නියඟය හේතුවෙන් සමනළවැව ජලාශය සිදී යෑමත් සමඟ කළ නිරීක්‍ෂණයේදී එම ජලාශයේ ජල කාන්දු වන ස්ථාන 7 ක් සොයාගත් බවත් කාන්දු වන ජල ප්‍රමාණයෙන් සියයට 70 ක් පමණ අතහැර දැමූ උමගකින් කාන්දුවන බවත් එම නිලධාරියා සඳහන් කළේය.  

මෙම ජල කාන්දුවෙන් වසරකට රුපියල් කෝටි 200 ක පමණ පාඩුවක් වන බවත් එම කාන්දුවීම් 7 න් පමණක් වසරකට ජලය ඝණමීටර මිලියන 20 ක් පමණ අපතේ යන බවත් ඉංජිනේරුවෝ වාර්තා කර තිබුණි.

එම අපතේ යන ජලය ඝණමීටර මිලියන 20 ක ඉතිරිකරගත හොත් විදුලිබල නිෂ්පාදනයට යොදාගැනීමෙන් විදුලිබල මණ්ඩලයට රුපියල් කෝටි 200 ක පමණ මුදලක් වසරකට ඉතිරිකරගත හැකි බව ද විදුලිබල මණ්ඩලය පවසයි.