(යොහාන් භාසුර)

ලංකා ඛනිජ තෙල් සංස්ථාව (සිපෙට්කෝ) ඉන්ධන මිල ඉහළ නොදමන බවත් බොරතෙල් මිල ඉහළ යෑමෙන් සංස්ථාවට වන පාඩුව හැකිතාක්කල් දරාගන්නා බවත් බලශක්ති අමාත්‍ය උදය ගම්මන්පිල මහතා ‘ලංකාදීප’යට පැවසීය.

පසුගිය මාසයේ සිට ඩීසල් ලීටරයකින් රුපියල් 35 ක සහ පෙට්‍රල් ලීටරයකින් රුපියල් 7 ක පාඩුවක් ලබන බව කී අමාත්‍ය උදය ගම්මන්පිල මහතා බොරතෙල් මිල තව දුරටත් ඉහළ ගිය හොත් පාඩුව තව දුරටත් වැඩි වන බව ද සඳහන් කළේය.

දෙසැම්බර් මස බොරතෙල් බැරලයක මිල ඩොලර් 74 ක්ව පැවතිය ද පසුගිය සතිය අවසන් වන විට බොරතෙල් බැරයක මිල ඩොලර් 93 ඉක්මවා දැවැන්ත ලෙස මිල ඉහළ ගිය බවත් බොරතෙල් මිල ඉහළ ගිය ද ඉන්ධන මිල ඉහළ දැමීමේ තීරණයක් ගෙන නොමැති බවත් අමාත්‍ය ගම්මන්පිල මහතා කීය.

ලංකා ඉන්දියන් ඔයිල් සමාගම ඉන්ධන මිල ඉහළ දැමීම පිළිබඳව කළ විමසුමේදී බලශක්ති අමාත්‍ය උදය ගම්මන්පිල මහතා අද (7) එසේ පැවසීය.

කොළඹ සහ අවට සිපෙට්කෝ ඉන්ධන පිරිවුම්හල් අසළ ඊයේ තරමක වාහන තදබදයක් දැකිය හැකි වූවද ඇතැම් ඉන්ධන පිරවුම්හල්වල ඔප්ටේන් 92 ක පෙට්‍රල් හිඟයක් පැවතුණි.