(ඩයනා උදයංගනී)

ශ්‍රී ලංකාවේ කොවිඞ් වසංගත තත්ත්වය මේ වන විට එහි තුන්වන මට්ටමට ළඟා වී ඇතැයි සෞඛ්‍ය ප්‍රවර්ධන කාර්යාංශයේ අධ්‍යක්‍ෂ, විශේෂඥ වෛද්‍ය පාලිත කරුණාප්‍රේම මහතා පැවසීය.

කොවිඞ් වසංගතයේ අදියර 4ක් පවතින අතර පළමු මට්ටමේදී විදේශවලින් පැමිණි අය වැනි පිරිස් අතුරින් කුඩා ප්‍රමාණයක් වාර්තාවීමත්,  දෙවන මටට්ම රට තුළ විශාල වශයෙන් නොපැතිරුණු එක් පොකුරක් පැවතීමත්, තුන්වන මට්ටමේදී රෝගී පොකුරු කීපයක් මතුවීම හා හතරවන මට්ටම පොකුරු කිහිපයක් සමඟ සමාජ පැතිරීමක් පවතින බවත් වෛද්‍ය පාලිත කරුණාප්‍රේම මහතා පැවසීය.

මෙම මට්ටම් පිළිවෙළින් කොළ, කහ, තැඹිලි, රතු වර්ණයන්ගෙන් දැක්වෙන බව ද කී වෛද්‍යවරයා මේ වන විට ශ්‍රී ලංකාවේ පවතින්නේ තුන්වන මට්ටමේ බව ද සඳහන් කළේය.

පාලිත කරුණාප්‍රේම මහතා මේ බව පැවසුවේ සෞඛ්‍ය ප්‍රවර්ධන කාර්යාංශයේ දී අද (6) පැවති මාධ්‍ය හමුවක් අමතමිනි.

රටේ නිරෝධායන ඇඳිරිනීතිය පවතින ප්‍රදේශවල මෙන්ම නොමැති ප්‍රදේශවලත් සියලුම රජයේ රෝහල් විවෘතව පවතින නිසා කිසියම් අයෙකුට හෘදයාබාධයක්, අංශභාග තත්ත්වයක් වැනි හදිසි රෝගී තත්ත්වයක් මතුවුවහොත්  රෝහල්වල බාහිර රෝගී අංශයට පැමිණිය යුතු බව ද කීවේය.

නිරෝධායනය වන අයකුට හදිසි රෝගී තත්ත්වයක් ඇතිවුවහොත් මහජන සෞඛ්‍ය පරීක්‍ෂකවරයා හෝ ප්‍රදේශයේ බලධාරියකුට දැනුම් දුන් විට ගිලන්රථයක් මගින් රෝහල් ගත කිරීමට ක්‍රමවේදයක් සකස් කර ඇති බව කී වෛද්‍යවරයා සෑම රෝහලකම නිරෝධායනය වන අය වෙනුවෙන් ද ප්‍රතිකාර කිරීමේ පහසුකම් පවතින බව පැවසීය.