(ඩයනා උදයංගනී)

සෞඛ්‍ය ක්‍ෂේත්‍රයේ හෙද, අතුරුවෙද්‍ය සහ පරිපූරක සේවාවන්හි වැටුප් හා දීමනා විෂමතා ඉවත්කිරීම ඇතුළු ගැටලුවලට විසඳුම් ලබාදෙන තුරු වැඩවර්ජනය අඛණ්ඩව පවත්වාගෙන යන බව සෞඛ්‍ය වෘත්තීයවේදීන්ගේ සම්මේලනයේ සම කැඳවුම්කරු සමන් රත්නප්‍රිය මහතා පැවසීය.

හෙද, අතුරුවෙද්‍ය සහ පරිපූරක සේවාවන්හි වෘත්තීය සමිති 18ක් එක්ව අද (7) උදෑසන සිට රට පුරා රෝහල්වල අඛණ්ඩ වැඩ වර්ජනයක් ආරම්භ කර ඇති බවත්, සෞඛ්‍ය අමාත්‍යාංශය ඉදිරිපිටදී හෙට (8) දහවල් දැවැන්ත විරෝධතාවයක් ද පවත්වන බවත් ඔහු සඳහන් කළේය.

ළමා රෝහල්, මාතෘ රෝහල්, වකුගඩු සහ පිළිකා රෝහල් මෙන්ම මධ්‍යම ලේ බැංකුව තුළ දැනට මෙම වර්ජනය ක්‍රියාත්මක කර නැතත්, තමන්ට කඩිනම් විසඳුමක් නොලැබුණහොත් එම ස්ථානයන් හිද වැඩවර්ජනය ආරම්භ කරන්නට වනු ඇතැයි රත්නප්‍රිය මහතා කීවේය.

ඔහු මේ බව පැවසුවේ කොළඹ දී පැවති මාධ්‍ය හමුවක් අමතමිනි.

සෞඛ්‍ය ඇමතිවරයා හා බලධාරීන් ගැටලුවලට විසඳුම් නොදී සිටීම හේතුවෙන් වැඩවර්ජනයක් දක්වායාමට සිදුවූ බව ද ඔහු පැවසීය.

මීට දින තුනකට පෙර සෞඛ්‍ය අමාත්‍යාංශ ලේකම්, අධ්‍යක්‍ෂ ජනරාල් ඇතුළු නිලධාරීන් සමඟ ධනාත්මක සාකච්ඡාවක් පැවැත්වූ නමුත් එයින් විසඳුමක් නොලැබුණු බව කී රත්නප්‍රිය මහතා විසඳුමක් ලැබෙන තුරු වැඩවර්ජනය අඛණ්ඩව ක්‍රියාත්මක කරනවා හැර වෙන විකල්පයක් නැතැයි ද කීවේය.

මෙම ගැටලු විසඳීමට සෞඛ්‍ය ඇමතිවරයා හෝ අමාත්‍යාංශය සූදානම් බවක් පේනෙන්නේ නැතැයි කී රත්නප්‍රිය මහතා ඒ වෙනුවට වෙනත් ගැටලු නිර්මාණය කරමින් වෘත්තීය ක්‍රියාමාර්ගවලට බාධා කරන්නට උත්සාහ ගන්නා බව ද සඳහන් කළේය.

මෙම අවස්ථාවේ වර්ජන නොකළ යුතු බවත්, ඉල්ලීම් 7න් 4ක් ලැබී ඇති බවත් මුරුත්තෙට්ටුවේ ආනන්ද හිමියන් කරන ප්‍රකාශයන්හි කිසිඳු සත්‍යතාවයක් නැතැයි ද හෙතෙම පැවසීය.