(සුජිත් හේවාජුලිගේ)

ගල් අඟුරු වංචාවට සම්බන්ධ අමාත්‍යවරයාට එරෙහිව ගෙන ආ විශ්වාසභංග යෝජනාව පාර්ලිමේන්තුවේදී පරාජයට පත් වුවද, එම ගනුදෙනුවල ඇති දූෂිත ස්වභාවය පිළිබඳ සත්‍ය තොරතුරු දැන් රට හමුවේ අනාවරණය වෙමින් පවතින බව විපක්ෂ නායක සජිත් ප්‍රේමදාස පවසයි.

තිස්සමහාරාමය ප්‍රදේශයේ විහාරස්ථාන කිහිපයක ආගමික වතාවත්වලට සහභාගී වීමෙන් අනතුරුව මාධ්‍යවේදීන් නැගූ ප්‍රශ්නවලට පිළිතුරු දෙමින් ඔහු ඊයේ මේ බව පැවසුවේය.

ටෙන්ඩරය දුන් සමාගම සැපයූ ගල් අඟුරු බාල ප්‍රමිතියෙන් යුක්ත වීම නිසා අවශ්‍ය ප්‍රමාණයට වඩා වැඩි ගල් අඟුරු ප්‍රමාණයක් භාවිත කිරීමට සිදුව ඇති බවත්, එය බලාගාර වාර්තා මගින්ද තහවුරු වී ඇති බවත් විපක්ෂ නායකවරයා වැඩිදුරටත් පෙන්වා දුන්නේය.