හම්බන්තොට මාගම්පුර වරායේ උපවාසයේ යෙදී සිටින්නන්ට මාගම්පුර වරායේ මෙහෙයුම් කටයුතු වලට බාධා නොකරන ලෙසට හම්බන්තොට මහේස්ත්‍රාත් මංජුල කරුණාරත්න මහතා අද නියෝග කළේය.

එම නියෝගය හම්බන්තොට සහකාර පොලිස් අධිකාරි ප්‍රසන්න ද අල්විස් මහතා   වර්ජනයේ නියැලී සිටින වරාය සේවකයින්ට බාර දුන්නේය.

අධිකරණ නියෝග අනුව වරායේ පිවිසුම් දොරටුව අසල ඇති අට්ටාලය ඉවත් කරගෙන වරායේ කටයුතු වලට බාධාවක් නොවන ලෙස වෙනත් ස්ථානයක අට්ටාලය ඉදි කර උපවාසය යළි අරඹන බව වරාය සේවක සංගමයේ සභාපති සුරංග ලක්මාල් මහතා කීවේය.

හම්බන්තොට වරායේ දොරටු අවහිර නොකිරීම,වරායට ඇතුල් වන හා පිටවන ජාත්‍යන්තර නැව්  වලට හා වෙනත්  යාත්‍රා වලට හානි නොකිරීම, වරායට පැමිණෙන නිත්‍යනූකුල පොලිස් හා නාවික හමුදා සේවාවන්වලට තර්ජනය නොකිරීම, වරායේ මෙහෙයුම් කටයුතු වලට අවශ්‍ය යම් උපකරණ හා යතුරු වේනම් ඒවා යම් වගකිව යුතු නිළධාරියෙක්  ඉල්ලා සිටින අවස්ථාවක දි ප්‍රමාදයෙන් තොරව ලබා දීමට කටයුතු කිරිම, වරායේ කිසිදු චංචල හෝ නිෂ්චල දේපලකට හානි සිදු නොකිරීම, වරාය අධිකාරියේ යම් වෘත්තිය සමිති ක්‍රියාමාර්ගයන්ට බාධා නොකිරීම, වෘත්තීය සමිති ක්‍රියාමාර්ග සඳහා වරායේ චංචල හා නිෂ්චල දේපල භාවිතා නොකිරීම යන කරුනු අධිකරණ නියෝගයේ සඳහන් වේ.