(විනීතා එම් ගමගේ)
 
විධායක ජනාධිපතිවරයාට තමන් සමඟ වැඩ කළ හැකි අගමැතිවරයෙක් පත් කර ගත යුතු බව සැබෑ යැයි කී රතත හිමියෝ ගොඩ වැඩි නම් 113 ත් ඇත්නම් වෙනත් කෙනෙක් නම් කිරීමට එක්සත් ජාතික පක්ෂය නම්යශීලී විය යුතු යැයි ද කීහ.
 
විජයදාස රාජපක්ෂ මහතා පාර්ලිමේන්තුවේ දී කළ කතාව මධ්‍යස්ථ යැයි තම මතය බවත් ඒ කරුණු වල සාධාරණයක් ඇති බවත් පැවැසූ රතන හිමියෝ බහුතරයක් නැත්නම් රැඳී සිටිය නොහැකි බවද ආණ්ඩුවක් ගෙනයා නොහැකි බව ද පැවැසූහ.
 
ඉකුත් රජයේ තිබූ වැරදි ආර්ථික පිළිවෙත නිවැරදි කරන්නේ කෙසේ ද යන තම ස්ථාවරය පාර්ලිමේන්තුවේ දී අද කියා සිටියේ යැයි ද උන් වහන්සේ කීහ. රටේ ජාතික සම්පත් විකීණීම නව ලිබරල් ආර්ථික පිළිවෙත විසින් රටට අවාසි සහගත තත්ත්වයක් ඇති කර තිබිණි යැයි කී රතත හිමියෝ පමා වන හැම දවසකම රටේ සම්පත් රටට අහිමි වන තත්ත්වයක් තිබූ බව ද කීහ.
 
ජනාධිපතිවරයා ගත් පියවරට සහය පළ කළේ ඒ නිසා යැයි පැවසූ රතන හිමියෝ එහි දී තම අභිමතය කුමක් වුවත් පාර්ලිමේන්තුවේ බහුතරය ආණ්ඩු පක්ෂය දිනා ගත යුතු  බවත් එසේ නොහැකි නම් සුළුතර ආණ්ඩුවක් ලෙස බහුතර ආණ්ඩුවකට පවතින්නට ඉඩ කඩ ලබා දිය යුතු බව ද පැවසූහ.
 
මෛත්‍රීපාල සිරිසේන මහතා රනිල් වික්‍රමසිංහ මහතා අගමැති කළේ සුළුතර ආණ්ඩඩුවක් ලෙස වන නමුත් එවකට සිටි බහුතර ආණ්ඩුව එයට පවතින්නට ඉඩ දුන් බව සිහි කළ රතන හිමියෝ මාස කිහිපයක් අවශ්‍ය නම් මේ සුළුතර ආණ්ඩුවට පවතින්නට ඉඩ දිය හැකි බව ද පෙන්වා දුන්හ.
 
රටේ ජනතා පරමාධිපත්‍යය දිනා සිටින ජනාධිපතිවරයාගේ තීන්දුව ව්‍යවස්ථාදායකය විසින් අභියෝගයට ලක්කර ඇතැයි පැවැසූ උන්වහන්සේ ජනාධිපතිවරයා විසින් ව්‍යවස්ථාදායකයේ ඇති සංයුතිය හා ස්වාභාවය වටහා ගෙන කටයුතු කළ යුතු යැයි ද කීහ.

කෙසේ වෙතත් අධිකරණ තීන්දුවකට යොමුවී ඇති බැවින් දහ වෙනිදාට පෙර යම් විසඳුමක්  ලබා  ගත හැකි යැයි විශ්වාස කරන බවත් රතන හිමියෝ පැවැසූහ. අධිකරණ තීන්දුව අනුව ඉදිරි පියවර තීරණය කළ හැකි වනු ඇතැයි ද ඒ අතරතුර යම් විමසුමකට එළැඹිය හැකි වනු ඇත්ද යන්න ගැන යමක් දැන්ම කිව නොහැකි යැයි ද උන්වහන්සේ ප්‍රකාශ කළහ.