(එම්.කේ.නන්දසේන)

දෙබරවැව ජනාධිපති කණිෂ්ඨ විද්‍යාලයේ 9 වසරේ සිසුවකුගේ පිටට පාසලේ විදුහල්පතිවරයා වේවැලෙන් පහරදී ඇති බව පවසමින් එම සිසුවා දෙබරවැව මූලික රෝහලට ඇතුළත්ව ඇත.

තිස්සමහාරාම මැදවැලෑන  පදිංචි අ 14 හැවිරිදි සිසුවකු තමා පාසලේ සිටියදී ළමයින් පිරිසක් රබර් පටිවලින් විදගෙන ඇති බවට චෝදනා නගමින් විදුහල්පතිවරයා වෙිවැලෙන් තමාගේ පිටට පහරදුන් බවත්, එම හේතුවෙන් පිට ඉලිප්පී රිදෙන බවත් තමා එම සිද්ධියට අදාල නැති බවටත්, රෝහල්පොලීසියට ප්‍රකාශයක් දෙමින් ප්‍රකාශ කර ඇත.

මේ සම්බන්ධයෙන් එම විදුහලේ විදුහල්පති ලීල් චන්ද්‍රකුමාර මහතාගෙන් විමසීමේදී ඒ මහතා මෙසේ කීය.

"ඕනෑම පාසලක අකීකරු ළමයි කොටසක් සිටිනවා. කිසිම ගුරුවරයකු ළමයකුට අමානුෂික පහරදීම් සිදු කරල අමාරුවෙ වැටෙන්න සූදානම් නෑ. අපි නිතරම උත්සාහ ගන්නේ ළමයි යහමගට ගන්නයි. ඔය පැමිණිල්ල කර ඇති ළමයගෙ අම්මා තාත්තා දෙන්නම නැහැ. මා හොඳට ඔය ළමය පිළිබඳව දන්නවා. මේ ළමයා බඩගිණ්නෙ එන දින බලලා මම කෑම පුද්ගලිකව දීපු අවස්ථා බොහෝමයි. සිදුවීම වූ දිනයේත් පුතේ ඔය ළමයා කෑම කාල නැහැ නේද කියා විමසල උදේ මම කෑම එකක් දුන්නා.

මෙි ළමයාට පැමිණිල්ලක් දාන්න තරම් සිදුවීමක් වුණේ නැහැ. අම්මා තාත්තා නැති වුණත් කවුරු හරි පසුබිමෙන් ඉඳගෙන කරපු පෙලඹවීමක් තමයි මට දැනෙන්නේ. මෙි ළමයගේ ගොඩක් විනය විරෝධී වැඩ තිබෙනවා. ඒවා විනය පොතේ සටහන් තබලා තියෙනවා. එසේ වුවත් අපි බලන්නේ ළමයා ඉවත් නොකර ගොඩ ගන්නටයි. මේ ළමයා පමණක් නොවෙයි ළමයි හතර දෙනකු පීරියඩ් එකක් කට් කරල පනින්න උත්සාහ කරද්දී තමයි අල්ලගෙන සුළු දඬුවමක් දුන්නා. පැමිණිලි කරපු ළමයට වේවැලෙන් පාරවල් දෙකක් ගැසුවා. මගේ හොඳම යාළුවෝ දෙදෙනකුගේ ළමයි දෙන්නකුටත් වේවැල් පහරවල් 4 බැගින් ගහලා තියෙනවා. ඒ ළමයින්ගේ පියවරු ඇවිල්ලා මට ස්තුති කරා අපිත් දඬුවම් දෙනවා කියලා කිව්වා.