(සුජිත් හේවාජුලිගේ සහ ඉන්දිකා  රාමනායක)

රාගම වෛද්‍ය පීඨයේ සිසුන් පිරිසකට පහරදී  තුවාල සිදු කරන ලදැයි කියන සිද්ධියට  සම්බන්ධ සියලු දෙනාට තරාතිරම නොබලා නීතිය ක්‍රියාත්මක කරන ලෙස මහජන ආරක්ෂක අමාත්‍ය විශ්‍රාමික රියාර් අද්මිරාල්  සරත් වීරසේකර මහතා  පොලිස්පතිවරයාට උපදෙස්දී ඇත.

මේ අනුව පොලිස්පතිවරයා  දුන් උපදෙස් අනුව බස්නාහිර පළාත් භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් මහතා විසින් සිද්ධිය පිළිබඳව  විමර්ශන පැවැත්වීම සඳහා විශේෂ පරීක්ෂණ කණ්ඩායම් දෙකක්  අද (2) පත් කරනු ලැබිය.

කැලණිය  පොලිස් අධිකාරීවරයාගේ අධික්ෂණය යටතේ මෙම පරීක්ෂණ කණ්ඩායම් දෙක ක්‍රියාත්මක වෙයි.

මේ සිද්ධිය සම්බන්ධයෙන් රාජ්‍ය ආයතනයකට අයත් මොටර් රථයක් හා එහි රියදුරු වෛද්‍ය  සිසුන් විසින්  සිය බාරයට ගෙන  රාගම පොලිසියට බාර දෙනු ලැබ ඇති බව මහජන  ආරක්ෂක අමාත්‍යාංශය පවසයි.

සිද්ධියට සම්බන්ධ සියලු සැකකරුවන් සොයා පූර්ණ පරීක්ෂණයක් කිරීමට කටයුතු කරන අතර ඊට අදාළ පුද්ගල  සාක්ෂි,විද්‍යාත්මක හා තාක්ෂණික සාක්ෂි ඔස්සේද පරීක්ෂණ කරනු ලබන බව අමාත්‍යාංශය වැඩිදුරටත් සඳහන් කරයි.