(මනෝප‍්‍රිය ගුණසේකර)

මහාධිකරණ විනිසුරු ගිහාන් කුලතුංග මහතා හමුවේ පවරා ඇති ලිත් නඩුව වෙනත් විනිසුරුවරයකු හමුවේ විභාගයට ගන්නැයි හිටපු අමාත්‍ය බැසිල් රාජපක්‍ෂ මහතා ඉදිරිපත් කළ පෙත්සම ලබන 26 වැනිදා කැඳවීමට අභියාචනාධිකරණය අද (03) නියම කළේය.

ජනාධිපතිවරණ පනතට පටහැනි වන ආකාරයට පසුගිය ජනාධිපතිවරණයේදී හිටපු ජනාධිපති මහින්ද රාජපක්‍ෂ මහතාගේ රුව ඇතුළත් කර දිවි නැඟුම දෙපාර්තමෙන්තුවේ මුදලින් ලිත් ලක්ෂ 50ක් මුද්‍රණය කර රජයට රුපියල් කෝටි දෙකකට අධික පාඩුවක් සිදු කළැයි නීතිපතිවරයා විසින් එම නඩුව පවරනු ලැබ ඇත.
 

සිල් රෙදි නඩුවේ විත්තිකරුවන් වු රාජ්‍ය සේවකයින්ට සිරදඩුවම් නියම කළ මහාධිකරණ විනිසුරුවරයා හමුවේ තමන්ගේ නඩුව විභාග කරනු ලැබුවහොත් තමුන්ට සාධාරණය හා යුක්තිය ඉටු වීමේ ප‍්‍රවණතාව අඩු බව පෙන්වා දෙමින් රාජපක්‍ෂ මහතා මෙම පෙත්සම ඉදිරිපත් කර ඇත.

එම පෙත්සම සම්බන්ධයෙන් එදින අධිකරණයේ පෙනී සිට කරුණු ඉදිරිපත් කරන ලෙස අභියාචනාධිකරණය නීතීපතිවරයාටද නියම කළේය.

මෙම පෙත්සම ඉදිරිපත් කරනු ලැබු අවස්ථාවේදී හිටපු අමාත්‍ය බැසිල් රාජපක්‍ෂ මහතා වෙනුවෙන් පෙනී සිටි ජනාධිපති නීතීඥ ගාමිණි මාරපන මහතා ඉදිරිපත් කළ කරුණු සැළකිල්ලට ගත් අභියාචනාධිකරණය එලෙස නියම කළේය.

මෙම පෙත්සම අභියාචනාධිකරණයේ සභාපති විනිසුරු එල්.ටී.බී. දෙහිදෙණිය සහ ශිරාන් ගුණරත්න යන මහත්වරුන් හමුවේ කැඳවන ලදී.

හිටපු අමාත්‍ය බැසිල් රාජපක්‍ෂ මහතා විසින් කරමින් ඉදිරිපත් කොට ඇති මෙම පෙත්සමේ වගඋත්තරකරු වශයෙන් නීතීපතිවරයා නම් කර ඇත.
 
අදාළ නඩුව ලබන නොවැම්බර් 13 වැනිදා සිට දිනපතා විභාග කිරීමටද කුලතුංග මහතා තීරණය කර ඇත.