ජපානයේ ෂිනගාවා සංක‍්‍රමණික මධ්‍යස්ථානයේ සිටි ශී‍්‍ර ලංකා රැඳවියෙකු මරණයට පත්ව ඇතැයි එරට මාධ්‍ය වාර්තා කරයි.

නිකෙල්ස් ප‍්‍රනාන්දු (57) නම් වන මෙම පුද්ගලයා තම පපුවේ වේදනාවක් ඇතැයිද තමාට රෝහලකට යෑමට අවශ්‍යයැයිද මධ්‍යස්ථානයේ සිටි මුරකරුවන්ට දන්වා තිබෙන බවත් නමුත් ඔවුන් කර ඇත්තේ ඔහු අනෙක් පුද්ගලයින්ගෙන් වෙන්කර තනි කුටියකට දමා සිර කිරීම බවත් සංක‍්‍රමණිකයින්ගේ අයිතීය වෙනුවෙන් පෙනී සිටින ජපාන සංවිධානයන් කියයි.

මේ දිනය ඉරිදා දිනයක් වූ හෙයින් රැඳවුම් මධ්‍යස්ථානයට අනුයුක්ත කර සිටි වෛද්‍යවරයාද නිවාඩු ගොස් සිටියේය.ඒ පිට දමා නිකෙල්ස් රෝහල කරා ගෙන යෑම මධ්‍යස්ථානයේ නිළධාරීන් මගහැර ඇතැයි එම සංවිධාන චෝදනා කරයි.

පැය කිහිපයක් වේදනාවෙන් කෑ ගසමින් සිට ඇති නිකෙල්ස් එක්වනම නිහඬවු බවත් ඔහු මිය ගිය බවත් සෙසු රැදැවියෝ කියති.

මේ සම්බන්ධයෙන් ප‍්‍රකාශයක් නිකුත් කර ඇති රැඳවුම් මධ්‍යස්ථානේ බළධාරීන් තමන්ට නැගෙන චෝදනා වල කිසිදු පදනමක් නැතැයිද තමන් කටයුතු කර තිබෙන ආකාරයේ කිසිදු වරදක් නැතැයිද පවසයි.

ජපායේ ඇති සංක‍්‍රමණික රැඳවුම් මධ්‍යස්ථාන වලින් මෙවැනි අවාසනාවන්ත සිදුවීම් කිහිපයක්ම පසුගිය සමයේදී වාර්තා විය.මෙම වසර මුලදී එවැනි රැඳවුම් මධ්‍යස්ථානයක සිටි ඉරාන ජාතිකයෙක් හා කැමරූන් ජාතිකයෙක් ඔවුන්ගේ රෝගාබාධ වලට ප‍්‍රතිකාර ලබාදීම මගහැරි බළධාරීන් හමුවේ මරුමුවට පත්වූහ.

එම බළධාරීන්ද තම නිදහසට කරුණු ලෙස පැවසුවේ මධ්‍යස්ථානයේ වෛද්‍ය පහසුකම් ප‍්‍රමාණවත් නොවන බවය.

වහා එම පහසුකම් සැපයීමට නියෝග ලැබී තිබියදී මෙසේ නිකෙල්ස් මරණයට පත්වීම ජපානයේ සංක‍්‍රමණික මධ්‍යස්ථාන කෙරේ නැගෙන විරෝධය තවත් තීව‍්‍ර වීමට හේතුවී තිබේ.