(ගයාන් සූරිය ආරච්චි)

සමගි ජන බලවේගය මොනරාගල  දිස්ත්‍රික් අපේක්ෂකවරයකු රැස්වීමක් ඇමතීම සඳහා ජීප් රථයකින් ගමන් කරමින් සිටියදී දඹගල්ල බුසලේ ප්‍රදේශයේදී නාදුනන පුද්ගලයෙකු විසින් රියදුරුගේ මුහුණට මිරිස් කුඩු ගසා ජීප් රථයේ සිටි අපේක්ෂකවරයාට පොල්ලකින් පහර දී ඇතැයි දඹගල්ල පොලිසිය පවසයි.

පහර කෑමට ලක් වූ අපේක්ෂකවරයා සහ රියදුරු මොමොනරාගල  කිරිගල රෝහලට ඇතුළත් කර ඇති බව පොලිසිය පවසයි.

මෙසේ පහර කෑමට ලක්ව ඇත්තේ මොනරාගල දිස්ත්‍රික්කයෙන් තරඟ වදින නීතිඥ ඉන්දික විජය බණ්ඩාර අත්තනායක නැමැත්තෙකි.

පාර්ලිමේන්තු අපේක්ෂකවරයා ඡන්ද ප්‍රචාරක රැස්වීමක් සඳහා සහභාගි වීමට ඔහුගේ රියදුරු සමඟ ජීප් රථයකින් ගමන් කරමින් සිටියදී දඹගල්ල  බුසල ප්‍රදේශයේ  පිහිටි මාර්ග බාධක  ගැට්ටක් ආසන්නයේ දී ජීප් රථයේ වේගය අඩුකර ඇති අතර එම අවස්ථාවේ දී අසල සිටි නාඳුනන පුද්ගලයකු රියදුරුගේ මුහුණට මිරිස් කුඩු ගසා ඇතැයි පොලිසිය පවසයි.

පසුව එම සැකකරු විසින් ජීප් රථයේ සිටි පාර්ලිමේන්තු අපේක්ෂකවරයාට පොල්ලකින් පහර දී පලා ගොස් ඇති බව පොලිස් විමර්ශනවලදී අනාවරණය වී ඇත.

අනතුරුව ප්‍රහාරයට ලක් වූ අපේක්ෂකවරයා සහ ඔහුගේ රියදුරු මොනවාගල කිරිගල රෝහලට ඇතුලත් කර ඇති අතර සැකකරු අත්අඩංගුවට ගැනීම සඳහා පොලිසිය විමර්ශන ආරම්භ කර ඇත.

දඹගල්ල පොලිසිය වැඩි දුර විමර්ශන සිදු කරයි.