(මනෝප්‍රිය ගුණසේකර)

විරෝධතා ව්‍යාපාරයට පොලිසියෙන් පහරදීමෙන් සිය මුලික අයිතිවාසිකම් කඩ කළ බවට සමාජවාදී තරුණ සංගමය ගොනු කර ඇති පෙත්සමේ වගඋත්තරකරුවකු වශයෙන් හිටපු ජනාධිපති රනිල් වික්‍රමසිංහ මහතා නම් කිරීමට ශ්‍රෙෂ්ඨාධිකරණය අද (22) අවසර දුන්නේය.

විරෝධතා ව්‍යාපාරයට පොලිසියෙන් පහරදීමෙන් සමාජවාදී තරුණ සංගමයේ මුලික අයිතිවාසිකම් කඩ කළ බවට පවරා ඇති පෙත්සමේ වගඋත්තරකරුවකු වශයෙන් හිටපු ජනාධිපතිවරයා නම් කිරීමට අවශ්‍ය බවට පෙත්සමකරුවන්ගේ නීතිඥවරයා කළ ඉල්ලීම පිළිගනිමින් පෙත්සම සංශෝධනය කිරීමටද ශ්‍රෙෂ්ඨාධිකරණය අවසර දුන්නේය.

ශ්‍රේෂ්ඨාධිකරණ විනිසුරුවරුන් වන එස්. තුරේරාජා, කුමුදුනී වික්‍රමසිංහ සහ ප්‍රියන්ත ප්‍රනාන්දු යන මහත්ම මහත්මීන්ගෙන් සැදුම්ලත් ශ්‍රේෂ්ඨාධිකරණ විනිසුන් මඩුල්ලක් හමුවේ පෙත්සම සලකා බැලීණි.

සමාජවාදී තරුණ සංගමයේ කමිටු සාමාජිකයකු වන මහේෂ් ඉඳුනිල් මහතා ගොනු කර ඇති පෙත්සමේ වගඋත්තරකරුවන් වශයෙන් කුරුදුවත්ත, මරදාන සහ කොම්පඤ්ඤවීදිය පොලීස්ථාන වල ස්ථානාධිපතිවරු ඇතුළු පිරිසක් නම් කර ඇත.

රජයේ ප්‍රජාතන්ත්‍ර විරෝධී වැඩපිළිවෙලට එරෙහිව පසුගිය සැප්තැම්බර් 27 වැනිදා කොළඹ ලිප්ටන් වටරවුම ආසන්නයේදී විරෝධතා ව්‍යාපාරයක් දියත් කළ බවත එම විරෝධතා ව්‍යාපාරයට පොලිසිය පහරදී විරෝධතා ව්‍යාපාරයට සම්බන්ධ වු විරෝධකරුවන් හයදෙනෙකු අත්අඩංගුවට ගත් බවත් සඟන් කරන පෙත්සම්කාර මහේෂ් ඉඳුනිල් මහතා ඉන් සිව්දෙනෙකු පොලිස් ඇප මත මුදාහළ බවත් දෙදෙනෙකු මහෙස්ත්‍රාත් අධිකරණයට ඉදිරිපත්කළ පසු ඇප මත මුදාහළ බවත් සඳහන් කර ඇත.

අධි ආරක්ෂිත කලාපයට නීති විරෝධී අන්දමින් ඇතුල් වු බව පවසමින් පොලිසිය තම සංවිධානයේ සාමාජිකයන් අත්අඩංගුවට ගත් බවත් අදාල අධිආරක්ෂිත කලාපය පිහිටුවා ඇත්තේ නීතියට පටහැනිව වන හෙයින් පොලිසිය සඳහන් කරන කරුණු වල සත්‍යතාවයක් නොමැති බවත් ස`ඳහන් කරන පෙත්සම්කාර මහේෂ් ඉඳුනිල් මහතා මෙම තත්ත්වය තුළ තමන්ගේ සහ තම සාමාජිකයින්ගේ මූලික අයිතිවාසිකම් කඩවී ඇතැයිද සඳහන් කර ඇත.