( තිළිණි ද සිල්වා සහ රංජන් කටුගම්පොළ )

සිරදඩුවම් නියමව අගුණකොළපැලැස්ස බන්ධනාගාරයේ සිටින හිටපු රාජ්‍ය අමාත්‍ය හා ගම්පහ දිස්ත්‍රික් පාර්ලිමේන්තු මන්ත්‍රී රංජන් රාමනායක මහතාට එරෙහිව ගොනු කළ අධිකරණයට අපහාස කරන ලදැයි දෙවැනි පැමිණිල්ල විභාගයට සදහා රාමනායක මහතා අද (3) දින බන්ධනාගාර නිලධාරීන් ශ්‍රේෂ්ඨාධිකරණය හමුවට ඉදිරිපත් කළේය.

මෙම පැමිණිල්ල සිසිර ද ආබෲ , මුර්දු ප්‍රනාන්දු සහ ප්‍රිති පද්මන් සුර්සේන යන මහත්ම මහත්මීන් ගෙන් යුතු ත්‍රිපුද්ල විනසුරු මඩුල්ල හමුවේ විභාගයට ගැනීමට නියමිතය.

රංජන් රාමනායක මහතා අධිකරණයට අපහාස කිරීම සම්බන්ධයෙන් වන පැමිණිල්ලට අදාළ චෝදනා පත්‍රය නීතිපතිවරයා මීට පෙර ශ්‍රේෂ්ඨාධිකරණයට බාර දෙන ලදී.

ඉකුත් 2018 වසරේ නොවැම්බර් මස පාර්ලිමේන්තුව විසුරුවා හැරීමට ජනාධිපතිවරයා ගත් තීරණය අභියෝගයට ලක් කරමින් ගොනු කරන ලද මූලික අයිතිවාසිකම් පෙත්සම් විභාග කිරීම සඳහා පත්කරනු ලැබූ ශ්‍රේෂ්ඨාධිකරණ විනිසුරු මඩුල්ල සම්බන්ධයෙන් රාජ්‍ය අමාත්‍ය රංජන් රාමනායක සිදු කළ ප්‍රකාශකින් අධිකරණයට අපහාස කර ඇතැයි එම චෝදනා පත්‍රයේ සඳහන්ව තිබිණි.

( ඡායාරූප - රොමේෂ් ධනුෂ්ක සිල්වා )