යෝජිත විදුලි ජනන සැළැස්ම ගැන මහජන අදහස් විමසයි

(අකිල බද්දෙවිතාන)

ඉදිරි වසර 20 සඳහා ක්‍රියාත්මක කිරීමට යෝජිත විදුලි ජනන සැළැස්ම සම්බන්ධයෙන් යෝජනා ඉදිරිපත්කරන ලෙස ශ්‍රී ලංකා මහජන උපයෝගිතා කොමිෂන් සභාව මහජනතාවගෙන් ඉල්ලා සිටී. 
වසර 2018 සිට 2037 දක්වා ඉදිකළ යුතු නව විදුලිබලාගාර ඇතුළත් දිගුකාලීන විදුලි ජනන සැළැස්ම ලංකා විදුලිබල මණ්ඩලය විසින් සකස් කර අනුමැතිය සදහා ඉදිරිපත් කර තිබේ.  මෙම සැළැස්ම සම්බන්ධයෙන් මහජනතාවට අදහස් හා යෝජනා ඉදිරිපත් කරන්නට අවස්ථාව ලබාදී ඒවාද සැළකිල්ලට ගැනීමෙන් අනතුරුව සැළැස්ම සම්බන්ධයෙන් අනුමැතිය දීමට කොමිෂන් සභාව තීරණය කර තිබේ. 
ඒ අනුව යෝජිත දිගුකාලීන විදුලි ජනන සැළැස්ම සම්බන්ධයෙන් උනන්දුවක් දක්වන සියලු පාර්ශවයන් හට සිය යෝජනා හා අදහස් ජුනි 6 වැනිදා තෙක් ඉදිරිපත් කළ හැකිය.
මේ වන විට ශ්‍රී ලංකාවේ ස්ථාපිත සමස්ත විදුලි බල ධාරිතාවය මෙගා වොට් 4018 කි. විදුලිබල ධාරිතාවයෙන් 82% ක් ලංකා විදුලිබල මණ්ඩලය සතුවන අතර ඉතිරි ප්‍රමාණය පෞද්ගලික අංශය සතු ය.
යෝජිත බලාගාර සැළැස්මට කුඩා ජල විදුලිබලාගාර, සුර්ය බලාගාර, ජෛව ස්කන්ධ බලාගාර සහ තාප බලාගාර ඉදිකීරීමට අපේක්ෂා කෙරෙන අතර ඇස්තමේන්තුගත ආයෝජනය රුපියල් බිලියන 2168 කි.
යෝජිත විදුලි ජනන සැළැස්මෙහි පිටපත් www.pucsl.gov.lk වෙබ් අඩවියෙන් හා ශ්‍රී ලංකා මහජන උපයෝගිතා කොමිෂන් සභා කාර්යාලයේ තොරතුරු කේන්ද්‍රෙයෙන් ද ලබාගත හැකිය.