ගමට එහි වැසියන්ට සෙත් පතා කොළඹට ආසන්න විහාරස්ථානයක ශාන්තිකර්මයක් පසුගියදා පැවැත්විණි. බෙර වාදකයන්, යකැදුරන් ඇතුළු බොහෝ පිරිසක් එහි පැමිණ සිටි අතර අධික වියදමක් දරා එය සංවිධානය කැර තිබිණි.

පන්සලේ ඇති දේවාලයේ අනුග්‍රහයද මීට ලැබිණි. යකැදුරා ආවේශ වී දුම්මල හතර අතේ ඉහළ අහසට නංවමින් ශාන්තිකර්මය ඇරඹීය. මධ්‍යම රාත්‍රියද පසුවී තිබියදී එය දිගටම පැවැත්විණි.

ඒ අතරතුර යකැදුරු ගැසූ දුම්මල පහරක් (කීල) මගින් අසල ඇති පොල්ගසක අත්තක් ඇවිලී ගියේය.

පොල් අත්ත ඇවිලීමෙන් ඇතිවූ ගින්න හේතුවෙන් අනෙක් අතුද ගිනි ගෙන මුළු පොල් ගහම විනාශවී ගිය අතර යකැදුරාට ගින්න නිවා ගැනීමට හැකියාවක් නොලැබිණි.

ශාන්තිකර්මය නැරඹීමට පැමිණ සිටි පිරිස පොල් ගස දෙස බැලුවේ යක්ෂයා ගසට ආරූඪ වී ඇත්දැයි සැකයෙනි. විහාරයේ හිමියන්ට ශාන්තිකර්මයක් කරන්නට ගොස් පොල් ගසක්ද අහිමිවූ බව ගැමියෝ කියති.