ජාතික ලැයිස්තු මන්ත්‍රීධූර සඳහා පරාජිත අපේක්ෂකයින් පත් කිරීමට එරෙහිව මහජන එක්සත් පෙරමුණේ උප සභාපති සෝමවීර චන්ද්‍රසිරි මහතා සහ  ගොනු කළ මූලික අයිතිවාසිකම් පෙත්සම විභාගයට නොගෙනම ප්‍රතික්ෂේප කිරීමට ශ්‍රේෂ්ඨාධිකරණය අද (26) තීන්දු කළේය.

එම පෙත්සම විභාගයට ගැනීමට තරම් නීතිමය පදනමක් නොමැති බවට තීරණය කළ අධිකරණය පෙත්සම ඉවත දැමීය.

ආණ්ඩුක්‍රම ව්‍යවස්ථාවේ 99 (1) ව්‍යවස්ථාව මඟින් ජාතික ලැයිස්තු මන්ත්‍රී ධූර පත් කිරීමට අදාළ නීතිරීති අනුව මැතිවරණ කොමසාරිස්වරයා කටයුතු කරමින් අදාළ ගැසට් නිවේදනය නිකුත් කර ඇති බැවින් එමඟින් මූලික අයිතීන් උල්ලංඝනය වීමක් සිදුව නැතැයි අධිකරණය තීරණ කරන ලදී.

අගවිනිසුරු කේ ශ්‍රී පවන් සහ කේ.ටී .චිත්‍රසිරි    යන මහත්වරුන්ගෙන් යුතු ශ්‍රේෂ්ඨාධිකරණ විනිසුරු මඩුල්ලක් ඉදිරියේ මෙම පෙත්සම් කැඳවන ලදී.

මැතිවරණ කොමසාරිස්වරයා, එක්සත් ජනතා නිදහස් සන්ධානයේ හිටපු මහලේකම් සුසිල් ප්‍රේමජයන්ත, එක්සත් ජනතා  නිදහස් සන්ධානයේ ජාතික ලැයිස්තු පාර්ලිමේන්තු මන්ත්‍රීවරුන් ලෙස පත්වූ පරාජිත අපේක්ෂකයින් 11 දෙනා සහ නීතිපතිවරයා මෙහි වගඋත්තරකරුවෝ ලෙස නම් කරනු ලැබ සිටියහ.