(ටෝනි කරුණානායක)

පූගොඩ මල්වානේ සුවිසල් නිවසක් ඉදිකර රජයේ මුදල් අවභාවිතා කිරීම සම්බන්ධයෙන් වූ නඩුවේ අධිචෝදනා පත්‍රයේ ලේඛන සහ සාක්ෂි සටහන් වල කොටසක් තමන්ට තවමත් ලැබී නැතැයි හිටපු අමාත්‍ය බැසිල් රාජපක්ෂ මහතා අද (04) අධිකරණයට දැනුම් දුන්නේය.

පූගොඩ මල්වාන මාපිටිගම අක්කර 17ක ඉඩමක් මිලට ගෙන එහි සුවිලස් නිවසක් හා නාන තටාකයක් ඉදිකර රජයේ මුදල් අවභාවිත කිරීම මත මුදල් විශුද්ධිකරණ පනත යටතේ හිටපු අමාත්‍ය බැසිල් රාජපක්ෂ හා තිරු නඩේෂන් යන අයට එරෙහි නඩුව අද (04) ගම්පහ මහාධිකරණ විනිසුරු ප්‍රියන්ත ප්‍රනාන්දු මහතා හමුවේ විභාගයට ගත් අවස්ථාවේදී මේ බව දැනුම් දුන්නේය.

බැසිල් රාජපක්ෂ මහතා වෙනුවෙන් පෙනී සිටි ජනාධිපති නීතිඥ ජයන්ත වීරසිංහ මහතා ඒ බව අධිකරණයට දැනුම් දුන් අතර තිරුකුමාරන් වෙනුවෙන් පෙනී සිටින ජනාධිපති නීතිඥ සාලිය පිරීස් මහතා අධිකරණයට දැනුම් දුන්නේ තම සේවාදායකයාගේ අධිචෝදනා පත්‍රයේ සිංහල ලේඛන සහ සාක්ෂි සටහන් ඉංග්‍රීසි භාෂාවෙන් හෝ දෙමළ භාෂාවෙන් පරිවර්තනය කර ලබා දෙන ලෙසයි.

නඩුව මෙහෙයවන රජයේ නියෝජ්‍ය සොලිසිටර් ජනරාල් තුසිත් මුදලිගේ මහතා මෙම ඉල්ලීම දෙකට එකඟ වූ අතර ඒ අනුව නඩුව නොවැම්බර් 23 වැනි දා කැඳවීමට තීන්දු කෙරිණ.