(රන්ජන් කටුගම්පොල සහ නිමන්ති රණසිංහ )

නීතියට පටහැනිව රැඳවුම් නියෝග මත රඳවා තබා තබාගනිමින් තම මූලික අයිතිවාසිකම් කඩවන ලදැයි සඳහන් කරමින් නියෝගයක් නිකුත් කරන්නැයි අන්තර් විශ්ව විද්‍යාල ශිෂ්‍ය බල බලමණ්ඩලයේ කැඳවුම්කරු වසන්ත මුදලිගේ මහතා ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සමක් අද (26) ගොනු කළේය .

නීතිඥ මංජුල බාලසූරිය මහතා මගින් ගොනු කර ඇති මෙම පෙත්සමේ වගඋත්තරකරුවන් වශයෙන් පොලිස්පති සහ  අපරාධ පරික්ෂණ දෙපාර්තමේන්තුවේ අධ්‍යක්ෂවරයා ඇතුළු හය දෙනකු නම් කරනු ලැබ ඇත.

ආරක්ෂක අංශ මඟින් ඉකුත් අගෝස්තු මස 18 වනදා තමන්ව නීති විරෝධී අයුරින් අත්අඩංගුවට ගෙන ආරක්ෂක අමාත්‍යවරයා වන ජනාධිපති රනිල් වික්‍රමසිංහ මහතාගේ නියෝග පරිදි රැදවුම්භාරයේ තබා ගෙන ඇතැයි පැමිණිලිකරු සිය පෙත්සමෙන් සඳහන් කර ඇත.

රජරට විශ්ව විද්‍යාලයේ පුරාවිද්‍යා උපාධිය හදාරමින් සිටින තමන් ගෝඨා ගෝ ගම අරගල භූමියේ සක්‍රීය අරගල කරුවෙකු වන බවත් ශිෂ්‍ය ක්‍රියාකාරිකයෙකු වශයෙන් මෙරට සමාජීය ප්‍රශ්න ගනනාවකටම සක්‍රීයව දායකත්වය දක්වා ඇති බවත් පෙත්සම්කරු සිය පෙත්සමෙන් ඉදිරිපත් කර තිබේ.

මේ හේතුවෙන් මෙම පෙත්සම විභාගයට ගෙන තමාගේ මූලික අයිතිවාසිකම් කඩ වී ඇති බවට සඳහන් කර නියෝගයක් නිකුත් කරන ලෙසත් තමන් බැලීම සඳහා තම පවුලේ ඥාතීන්ට සහ නීතිඥවරයෙකුට අවසර ලබාදෙන ලෙසට නියෝගයක් නිකුත් කරන්න ලෙසත් පෙත්සම්කරු සිය පෙත්සමෙන් ඉල්ලා ඇත.

එසේම රැඳවුම් නියෝග අවලංගු කර තමන් මුදා හරින ලෙසට නියෝගයක් නිකුත් කරන්නැයි ද පෙත්සම්කරු සිය පෙත්සමෙන් ශ්‍රේෂ්ඨාධිකරණයෙන් ඉල්ලා තිබේ.