මැයි දිනයෙන් පසු දකුණු පළාත් සභාවේ ඇතුලු පළාත් සභා කිහිපයක අමාත්‍ය මණ්ඩලත් වෙනස් කර රටේ ද වෙනස්කම් කිහිපයක් සිදුකිරීමට කටයුතු කරන බව මෛත්‍රීපාල සිරිසේන ජනාධිපති ගාල්ලේ දී අද කීවේය. මැයි දිනය පැවැත්වෙන ගාල්ලේ පළාත් පාලන නියෝජිතයන් අමතමින් ජනාධිපතිවරයා මේ බව ප්‍රකාශ කළේය. ගාල්ල කොටුවේ පැවති මෙම රැස්වීමේ දී පළාත් පාලන නියෝජිතෙයා් පසුගිය ජනාධිපතිවරණයේ දී මහින්ද රාජපක්ෂ හිටපු ජනාධිපතිවරයා වෙනුවෙන් ඡන්ද වැඩ කළ හැටි ද ප්‍රකාශ කළහ.

ජනාධිපතිවරයා මේ අවස්ථාවේ කියා සිටියේ මහින්ද රාජපක්ෂ ජනාධිපතිකිරීමට තමන් තරම් කැපවුණු වෙහෙස වුණු කෙනෙකු ශ්‍රී ලංකා නිදහස් පක්ෂයේ නොමැති බවයි. 2005 දී පක්ෂ නායිකාව වූ හිටපු ජනාධිපතිනි චන්ද්‍රිකා කුමාරණතුංග මහත්මියගේ මතයට පවා පිටුපාමින් තමන් මහින්ද රාජපක්ෂ ජනාධිපතිකරවීමට දැඩි වෙහෙසක් ගත් බව ද මෛත්‍රීපාල සිරිසේන ජනාධිතිවරයා කීවේය. ඒ නිසා පක්ෂය ගැනත් කළ යුතු දේත් තමන් හොඳින් දන්නා බවත් ශ්‍රී ලංකා නිදහස් පක්ෂයේ ඇතැම් පිරිස් වෙනත් පක්ෂවල වුවමනා එපාකම් ඉටුකරමින් දැන් පක්ෂයෙන් ඉවත්ව පක්ෂයේ සමගිය ගැන කතා කිරීම විහිළුවක් වී ඇතැයි ද ජනාධිතිවරයා කීය.