(සුජිත් හේවාජුලිගේ )


විවිධ මාධ්‍ය ඔස්සේ පැතිරෙන  යම් යම් මිථ්‍යා මත නිසා  කොවිඩ්  තුන්වෙනි මාත්‍රාව ලබා ගැනීමේ  සැලකියයුතු පසුබෑමක්  දක්නට ලැබෙන බව නියෝජ්‍ය සෞඛ්‍ය සේවා අධ්‍යක්ෂ ජනරාල්   විශේෂඥ වෛද්‍ය හේමන්ත හේරත් මහතා පැවැසීය.

දැනට  කොවිඩ්  තුන්වෙනි මාත්‍රාව ලබා ගෙන ඇත්තේ  ලක්ෂ තිස් තුනක පමණ පිරිසක් පමණක් බවද  හෙතෙම සඳහන් කළේ‍ය.

මෙය ප්‍රමාණවත් තත්වයක් නොවේ යැයි පැවසූ  විශේෂඥ වෛද්‍යවරයා මිත්‍යා මතවලට රැවටී තුන්වෙනි මාත්‍රාව ලබා ගැනීමෙන් වැළකීම  තමන්ගේ සෞඛ්‍ය තත්වය  නොසලකා හැරීමක් බවද පැවසුවේය.

ලෝකයේ සමහර රටවල් තුන්වෙනි මාත්‍රාව ලබා දීම අවසන් කර සිවුවැනි මාත්‍රාවට  යොමුවී සිටින බවද  ඔහු පෙන්වා දුන්නේය.

යමෙකුට   යම් සෞඛ්‍යමය ප්‍රශ්නයක් තිබේ නම්  අදාළ වෛද්‍යවරයා   හමුවී ඒ ගැටලුව නිරාකරණය කරගෙන  තුන්වෙනි මාත්‍රාව ලබා ගන්නැයි  ඉල්ලීමක් කරන බව පැවසූ හේමන්ත හේරත් මහතා තුන්වෙනි මාත්‍රාව ලබා නොගෙන කොවිඩ්  වසංගතය තුරන් කර ගැනීම
දුෂ්කර බවද  සඳහන් කළේය.

මේ තත්වය යටතේ  රෝගී පුද්ගලයන් හරහා වයිරසය  පැතිරීම දිගින් දිගටම සිදුවී කොවිඩ්  ප්‍රශ්නය අවසානයක් නොදකින තැනකට ගමන් කළ හැකි බවද  ඔහු පැවසුවේය.