(තරිඳු ජයවර්ධන සහ  ටෝනි කරුණානායක)

ගම්පහ රතුපස්වල පිරිසිදු පානීය ජලය ඉල්ලූ ප්‍රදේශවාසීන්ට වෙඩි තැබූ යුද හමුදා කණ්ඩායම බාරව සිටි බ්‍රිගේඩියර් අනුර දේශප්‍රිය ගුණවර්ධන ලබන 31 වැනිදා තෙක් රිමාන්ඩ් කරන ලෙස ගම්පහ ප්‍රධාන මහේස්ත්‍රාත් ඩී.ඒ රුවන් පතිරණ මහතා අද (25) නියෝග කළේය.

පුද්ගලයන් තිදෙනකු ඝාතනය කිරීම,මීනීමැරීමට තැත් කිරීම හා ආධාර අනුබල දීමේ චෝදනා යටතේ අපරාධ පරීක්ෂණ දෙපාර්තමේන්තුවේ විශේෂ විමර්ශන ඒකකය විසින් දේශප්‍රිය ගුණවර්ධන මහතා අද දහවල් අත්අඩංගුවට ගනු ලැබීය.

වැලිවේරිය විරෝධතාව විසිරීම සඳහා යුද හමුදාව පැමිණ ඇත්තේ පොලිසියේ කැඳවීමකින් තොරව බවත් එම අවස්ථාවේ එම ස්ථානයේ සාමකාමී වාතාවරණයක් පැවති බවත් කලබලකාරී තත්ත්වයක් ඇති වීනම් එය විසිරවීමට පොලිස් කැරලි මර්දන ඒකකය සහ ජල ප්‍රහාරක රථ සුදානමින් තිබූ බවත් අපරාධ පරීක්ෂණ දෙපාර්තමේන්තුව අධිකරණයට දැන්වීය.

මිනීමැරීම් චෝදනා යටතේ ගුණවර්ධන සුරිය ආරච්චිලාගේ දොන් අනුර දේශප්‍රිය මහතා මැයි 31 වැනි දා තෙක් රිමාන්ඩ් කරන ලෙස රහස් පොලිසිය ඉල්ලා සිටියේය.

සැකකාර බ්‍රිගේඩියවරයා අත්අඩංගුවට ගැනීමට එරෙහිව මූලික අයිතිවාසිකම් පෙත්සමක් ගොනු කරන හෙයින් බී වාර්තාවේ පිටපතක් ලබාදෙන ලෙස බ්‍රිගේඩියවරයා වෙනුවෙන් පෙනී සිටි නීතීඥ නලින්ද ඉන්ද්‍රතිස්ස මහතා අධිකරණයෙන් ඉල්ලීමක් කළේය.ඊට ප්‍රධාන මහේස්ත්‍රාත්වරයා අවසර දුන්නේය.

2013 අගෝස්තු 01 වැනි දා වැලිවේරියේදී  කළ වෙඩි තැබීමෙන් අකිල දිනේෂ් සහ රමිල රවිශාන් යන සිසුහූ දෙදෙනා සහ   නිලන්ත පුෂ්පකුමාර නම් තරුණයා ජීවිතක්ෂයට පත් වූහ.

මේ සම්බන්ධයෙන් කොළඹ අපරාධ කොට්ඨාසය මුලින්ම විමර්ශන පැවැත්වූ අතර එම විමර්ශන අපරාධ පරීක්ෂණ දෙපාර්තමේන්තුවට පවරන ලෙස ඉල්ලා ශ්‍රී ලංකා තරුණ ජනමාධ්‍යවේදීන්ගේ සංගමය සහ රතුපස්වල ප්‍රදේශවාසීහු පොලිස්පතිට සහ නීතිපතිට 2015 පෙබරවාරී 06 වැනි දා පැමිණිලි කළහ.

ඒ අනුව 2015 මාර්තු 05 වැනි දා පොලිස්පතිවරයා විසින් රතුපස්වල පරීක්ෂණ රහස් පොලිසියට පවරනු ලැබීය.

රහස් පොලිසියේ ප්‍රධාන පොලිස් පරීක්ෂක රංජිත් මුණසිංහ මහතා සහ උප පොලිස් පරීක්ෂක උපාලි බණ්ඩාර මහතාගේ මෙහෙයවීමෙන් පරීක්ෂණ සිදු කෙරිණ.

150 දෙනකුට අධික පිරිසකගෙන් ප්‍රකාශ සටහන් කරගත් රහස් පොලිසිය විසින් පසුගිය අප්‍රේල් මාසයේදී යුද හමුදාවේ තිදෙනෙක් අත්අඩංගුවට ගනු ලැබූහ.

යුද හමුදා මාණ්ඩලික සැරයන් ඩිංගිරි අරුණගේ සිරිසේන, සැරයන් ලලිත් ගේ‍්‍ර සහ කෝප‍්‍රල් ජයසුන්දර මුදියන්සේලාගේ තිලකරත්න යන යුද හමුදා සාමාජිකයෝ තිදෙනා තවමත් රිමාන්ඩ් බාරයේ සිටිති.

යුද හමුදාව වැලිවේරිය කතෝලික දේවස්ථානය තුළද වෙඩි තැබීම් සහ පහරදීම් කර ඇති බව රහස් පොලිසිය ප්‍රකාශ කළේය.

බ්‍රිගේඩියර්වරයා අත්අඩංගුවට ගත් බවට ආරංචි වී සියනෑ පරිසරය සුරැකීමේ ඒකාබද්ධ සංවිධානයේ කැඳවුම්කරු සුරේෂ් පෙරේරා ඇතුළු ප්‍රදේශවාසීන් පිරිසක් අධිකරණ භූමියට පැමිණ සිටියහ.

අපරාධ පරීක්ෂණ දෙපාර්තමේන්තුව වෙනුවෙන් ප්‍රධාන පොලිස් පරීක්ෂක රංජිත් මුණසිංහ මහතා සහ උප පොලිස් පරීක්ෂක උපාලි බණ්ඩාර මහතා පෙනී සිටි අතර සැකකරුවන් වෙනුවෙන් නීතීඥ නලින්ද ඉන්ද්‍රතිස්ස මහතා සහ නීතීඥ චින්තක අමරසිංහ මහතා පෙනී සිටියහ.

අධිකරණය විසින් රිමාන්ඩ් කරනු ලැබූ බ්‍රිගේඩියර් දේශප්‍රිය ගුණවර්ධන මහතා පොලිස් සහ බන්ධනාගාර රැකවල් මධ්‍යයේ බන්ධනාගාර රථයකින් රැගෙන යනු ලැබීය.