ඒකාබද්ධ විපක්ෂයේ පාර්ලිමේන්තු මන්ත්‍රී උදය ගම්මන්පිල සහ බන්දුල ගුණවර්ධන මහත්වරුන්ගේ ගමන් මලු ඊයේ (31) ස්විට්සර්ලන්තයේ ජිනීවා නුවරට ළඟාවූ අවස්ථාවේදී අතුරුදන්ව ඇතැයි වාර්තාවේ.

ගම්මන්පිල හා ගුණවර්ධන මන්ත්‍රීවරු ජිනීවා නුවරට පැමිණියේ තනි තනිවමය. මන්ත්‍රී ඩලස් අලහප්පෙරුමද එහි ගිය අතර ඔහු ගියේ තවත් යානයකිනි. ඒ අනුව මන්ත්‍රීවරුන් තිදෙනා ගුවන් යානා තුනකින් ජීනීවා නුවරට ගොස් ඒකාබද්ධ විපක්ෂය වෙනුවෙන් ජිනීවා නුවර අන්තර් පාර්ලිමේන්තු සංගමයේ ප්‍රධාන කාර්යාලයට සංදේශයක් බාර දුන්හ. ඒ තමනට මූල්‍ය අපරාධ විමර්ශන ඒකකයෙන් හා රජයෙන් සිදුවෙතැයි කියන අසාධාරණයන් සම්බන්ධයෙන් ජාත්‍යන්තරය දැනුම්වත් කිරීම සඳහාය.

උදය ගම්මන්පිල මහතා පළමුවෙන්ම ජිනීවා නුවරට ළඟාවූ අතර එහිදී සිය ගමන් මල්ල නැතිවී ඇතැයි ඔහුට දැනගන්නට ලැබී ඇත. නිශ්චිතවම එය ගමනාරම්භයේදී ගුවන්යානයට දමා නැති බව කියති. ඔහු ඒ සම්බන්ධයෙන් ජිනීවා ගුවන්තොටුපළට දැනුම් දුන්නේය.

ඒත් සමගම මන්ත්‍රී බන්දුල ගුණවර්ධන ජිනීවා නුවරට ගොඩබැස්සේය.  ඔහු පුදුමයෙන් ගම්මන්පිල ළඟට ගොස් තමාගේ ද ගමන් මල්ල නැතිවූ බව දන්වා සිටියේය.

ඒ සමගම ගම්මන්පිල ඔහුට ප්‍රතිචාර දක්වමින් කියා සිටියේ ගමන් මලු නැතිවූවන්ගේ සමාජයට ඔහුවද සාදරයෙන් පිළිගන්නා බවයි.

බන්දුල ගුණවර්ධන සිය අත් බෑගයේ අවශ්‍ය තරම් ඇඳුම් දමාගෙන පැමිණ සිටි නමුත් ගම්මන්පිලගේ සියලු අත්‍යවශ්‍ය ද්‍රව්‍ය ඔහුගේ නැතිවූ ගමන් මල්ලේ දමා තිබී ඇත. ඒ හේතුවෙන් ඔහුට දත් බුරුසුවේ සිට සියලු දෑ මිලට ගැනීමට සිදුව ඇත.

කෙසේ හෝ ඒකාබද්ධ විපක්ෂයේ සංදේශය අන්තර් පාර්ලිමේන්තු සංගම් ප්‍රධාන කාර්යාලයට බාරදෙනු ලැබු අතර එම සංදේශය ගම්මන්පිලගේ පරිගණක බෑගයේ තිබීම හේතුවෙන් ඔවුන් මුහුණ පෑමට ගිය උභතෝකෝටික ප්‍රශ්නයකින් ගැලවීමට හැකිවී ඇතැයි වාර්තාවේ.