(අංජුල මහික වීරරත්න)

බිත්තර සහ කුකුළු මස් මිල යළිත් ඉහළ යාමක් සිදු නොවනු ඇතැයි කෘෂිකර්ම අමාත්‍ය මහින්ද අමරවීර මහතා පැවසීය. 

ලබන වසරේ සිට බිත්තර සහ කුකුළු මස් මිල පහළ යන බවද අමාත්‍යවරයා කීය.

 ලබන වසරේ සිට බිත්තර ආනයනය සඳහා ද අවශ්‍යතාවක් මතු නොවන බව  අමාත්‍යවරයා සඳහන් කළේය.

කෘෂිකර්ම අමාත්‍ය මහින්ද අමරවීර මහතා මේ බව කීවෙි  ‘ස්ථාවර රටකට සැවොම එක මඟකට’ මැයෙන් අද  (14) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

මේ වන විට සියලු ගොවිපොළවල කුකුළු පැටව්  3,420,000ක් ඉක්මවා තිබෙන බවද එම සතුන් ලබන දෙසැම්බර් මාසය වන විට බිත්තර දමන අතර ලබන දෙසැම්බර් මාසයෙන් පසුව මෙරට බිත්තර නිෂ්පාදනය තවදුරටත් ඉහළ යනු ඇති බව එම කර්මාන්තකරුවන් පැවසීයැයි කෘෂිකර්ම අමාත්‍යවරයා කීය.

 දැනට පවතින දෛනික බිත්තර හිඟය ලක්ෂ 10ක් බව කී අමාත්‍යවරයා  ඉදිරි මාස තුන ඇතුලත  මෙම හිගය පියවීමට හැකියාව ලැබෙන බව පැවසීය.