(සුජිත් හේවාජුලිගේ )

අඩු මිලට ගෙන්වූ පොහොර සඳහා ජාතික පොහොර ලේකම් කාර්යාලය පොහොර සමාගම් එකොළහකට  රුපියල් කෝටි 150 කට වැඩි මුදලක් 2018-2020 අතර කාලයේදී  වැඩිපුර   ගෙවා ඇතැයි කියන සිද්ධියක් පිළිබඳව රජයේ  විගණකාධිපති දෙපාර්තමේන්තුව කළ විමර්ශනයකදී තොරතුරු අනාවරණයවී ඇත.

වැඩිපුර මුදලක්  මෙලෙස  ගෙවා ඇතැයි පැවසෙන්නේ පොහොර සහනාධාරය වෙනුවෙනි.

පොහොර සමාගම් 11ක් 2020 මුල් කාර්තු දෙකේ  අවස්ථා 213 කදී පොහොර ආනයනය කර ඇති බවත්  අඩු මිල යටතේ ගෙන්වූ  මෙම පොහොර සඳහා( පොහොර සහනාධාරය ලෙස) ජාතික පොහොර ලේකම් කාර්යාලය රුපියල් කෝටි 50 කට වැඩි මුදලක් වැඩිපුර ගෙවා ඇතැයි   රජයේ විගණකාධිපතිවරයාගේ වාර්තාවක සඳහන් වේ.

එම පොහොර ගෙන්වූ අවස්ථා 213 දීම  ආනයනික මිල ( Invoice price) මිල කමිටුව තීරණය කළ මිලට වඩා අඩු අගයක් ගෙන තිබූ බව  දක්නට ලැබුණේ යැයිද  ඒ වාර්තාවේ දැක්වෙයි.

එසේම  පොහොර ආනයනය කළ සමාගම් කිහිපයකට කෘෂිකර්ම අමාත්‍යාංශය පත් කළ මිල කමිටුවේ මිල සූත්‍රයෙන් බැහැරව 2018වර්ෂයේදී රුපියල් කෝටි සියයකට ආසන්න මුදලක් වැඩිපුර ගෙවා ඇතැයි  පවසන රජයේ විගණකාධිපති දෙපාර්තමේන්තුව වර්ග හතරකට අයත් පොහොර මෙට්‍රික් ටොන් 156272.5ක් වෙනුවෙන් මෙලෙස වැඩිපුර මුදල් ගෙවා ඇති බවද  සඳහන් කරයි.

මිල ගණන් තීරණය කිරීමේදී රජයට අවම අවාසියක් ඇතිවන පරිදි, සාධාරණ ආකාරයට එම  කටයුතු කිරීමට   මුදල් කමිටුවට හැකියාව තිබුණත් එවැන්නක් සිදුවී නැතැයිද  විගණකාධිපති දෙපාර්තමේන්තුව පවසයි.

වෙළෙඳපොළ වටිනාකම තක්සේරු කර ගෙවීම් කළ හැකිව තිබුණත් සහනාධාර ක්‍රියාත්මක වන දිනට ආනයන සමාගම් සතු අගයන් සලකා විවිධ මිල ගණන් යොදාගෙන මෙලෙස සහනාධාර මුදල් ගෙවීම් කර තිබූ බවද එම දෙපාර්තමේන්තුව සඳහන් කරයි.