ආර්ථික සහ වාණිජ අමාත්‍යාංශයට පසුගිය මාසයේදී පාරිභෝගික ආරක්ෂණ නීතිය උල්ලංඝනය කිරීමේ සිදුවීම් 78 ක් වාර්තාවී ඇති අතර එම ලැයිස්තුවේ ඉහළින්ම තිබෙන්නේ නිෂ්පාදන මත මිල පත්‍රිකාව ප්‍රදර්ශනය නොකිරීම සහ අදාළ බලධාරීන්ගේ නිසි අවසරයක් නොමැතිව මිල ඉහළ දැමීම යන වැරැදිය.
මෙම උල්ලංඝනය කිරීම් හේතුවෙන් සමහර වෙළෙඳසැල් තාවකාලිකව වසා දැමීමට මෙන්ම කටාර් රියාල් 5000 සිට 30,000 දක්වා පරාශයක විහිදුණු දඩ නියම කිරීමටද අමාත්‍යාංශය කටයුතු කර තිබේ.

රටේ සියලුම වෙළෙඳසැල් 2008 අංක 8 දරණ නීතියට අනුකූල වන බහ තහවුරු කරගැනීම සඳහා අමාත්‍යාංශය පසුගිය මාසයේදී සිය වැටලීම් වැඩි කොට ඇති අතර රට පුරා සිදුකළ මෙම වැටලීම්වලදී නීතිය උල්ලංඝනය කිරීම් 78 ක් අනාවරණය කරගෙන තිබේ. ඒ අතුරින් මිල සඳහන් නොවීමේ සිද්ධීන් 17 ක්, නිසි අවසරයකින් තොරව මිල ඉහළ දැමීමේ සිදුවීම් 8 ක් සහ භාණ්ඩය පිළිබඳව අසත්‍ය හෝ නොමග යවන සුළු විස්තර ලබාදීමේ සහ දැන්වීමේ පළකිරීමේ වැරැදි 8 ක්ද වෙයි.

අනෙක් වැරැදි අතර පළතුරු සහ එළවළු සඳහා නියම කළ මිල ලැයිස්තුවට අනුකූල නොවීම් 7 ක්, අසම්පූර්න බිල්පත් නිකුත් කිරීම් 6 ක්, නිෂ්පාදනයේ තොරතුරු සඳහන් නොකිරීම හෝ අසම්පූර්ණ තොරතුරු ඉදිරිපත් කිරීම් 5 ක්, ප්‍රචාරනය කළ මිලට වඩා වැඩි මිලක් පාරිභෝගිකයන්ගෙන් අයකිරීම් 5 ක්, නිසි බලධාරීන්ගෙන් පූර්ව අවසරයක් නොමැතිව ප්‍රවර්ධන වැඩසටහන් ආරම්භ කිරීම් 4 ක් සහ සේවාවේ හෝ නිෂ්පාදනයේ මිල පැහැදිලිව ප්‍රදර්ශනය නොකිරීම් 3 ක්ද වෙයි.